Hnémeiðsli settu strik í reikninginn hjá slökkviliðsmönnum

„Fyrstu dagarnir voru afar strembnir og veðrið erfitt," segir Jón Viðar Matthíasson, slökkviliðsstjóri á höfuðborgarsvæðinu. Jón hjólar nú hringinn í kringum landið ásamt nokkrum slökkviliðsmönnum frá höfuðborgarsvæðinu og Landsspítalanum.

„Í dag var stefnan tekin á Egilsstaði en hnémeiðsli urðu til þess að við stoppuðum við Jarðböð í Mývatnssveit."

Jón Viðar segir að ferðin hafi gengið áfallalaust hingað til en það ætti þó ekki að koma á óvart að meiðsli myndu setja strik í reikninginn. „Þetta er náttúrulega gríðarlega sprengja. Við hjólum mikið á hverjum degi og ýmislegt getur komið upp á."

Á morgun munu slökkviliðsmennirnir hjóla í átt að Reyðarfirði en þeir munu þó heilsa upp á kollega sína á Egilsstöðum í leiðinni.

Með því að hjóla hringinn vilja slökkviliðsmennirnir vekja athygli á hjálmanotkun fullorðinna hjólreiðamanna. Jón segir að yngri hjólreiðamenn muni yfirleitt eftir því að setja upp hjálminn, þeir sem eldri eru virðast þó gleyma honum frekar.