Leikur í sjö þáttum á Havaí

„Ég fæ hlutverk í sjö þáttum af tólf,“ segir leikarinn Darri Ingólfsson sem fer með hlutverk í sjónvarpsþáttunum Last Resort sem framleiddir eru fyrir ABC sjónvarpsstöðina. Ákveðið var að framleiða tólf þátta þáttaröð eftir að svonefndur „pilot“ þáttur sló í gegn.

Darri fer með hlutverk Robert Mitchell sem á í ástarsambandi við Kylie Sinclair sem leikin er af Autumn Reeser. Reeser hefur áður leikið í Entourage og The O.C.. Darri segir hlutverk sitt lítið en að hann komi eitthvað meira við sögu í síðustu tveimur þáttum þáttarraðarinnar. „Við tókum upp þátt þrjú og fimm í ágúst og svo fer ég aftur til Havaí í lok mánaðarins til að skjóta síðustu fjóra þættina. Það tekur að jafnaði viku að skjóta hvern þátt en ég flýg heim til LA á milli þar sem að umboðsmennirnir mínir vilja að ég geti mætt í áheyrnaprufur.“

Gagnrýnendur hafa gefið þáttunum góða dóma en Darri segir viðtökur almennings ráða því hvort að fleiri þáttaraðir verði framleiddar.

Tökur á þáttunum fara fram í Havaí á sama stað og lögregluþættirnir Hawaii Five-0 voru teknir upp. Að sögn Darra er lífið tökustað ágætt enda er margt hægt að finna sér til dundurs á Havaí. „Fólkið sem ég vinn með er allt yndislegt og við búum á mjög fínu hóteli í Waikiki. Ég hef eignast marga góða vini í gegnum vinnuna og hér er ýmislegt hægt að gera tl að slappa af eftir vinnu.“

Inntur eftir því hvað taki við næst segir Darri það óráðið að svo stöddu.

„Ég er kominn með nýjan umboðsmann sem þykir mjög góður og það er mjög spennandi að sjá hvað gerist næst.“ -sm