Blindrafélagið kærir Kópavogsbæ

Lögmaður Blindrafélagsins hefur sent Úrskurðarnefnd félagsþjónustu og húsnæðismála hjá Velferðarráðuneytinu stjórnsýslukæru vegna meintra brota Kópavogsbæjar á rétti blinds 17 ára drengs til lögbundinnar ferðaþjónustu. Blindrafélagið segir að þetta sé fyrsta mál sinnar tegundar eftir að sveitarfélögin tóku við málefnum fatlaðra. Það hafi ritari nefndarinnar staðfest.

Blindrafélagið segir að Kópavogsbær sniðgangi lögboðna skyldu sína til að veita fötluðum fullnægjandi ferðaþjónustu. Í stað þess að veita fötluðum ferðaþjónustu sem sé í samræmi við þarfir þeirra og fötlun veitir Kópavogsbær öllum eins þjónustu óháð öllum atvikum að aðstæðum. Þetta sé sambærilegt við það að Kópavogsbær væri skuldbundinn til að veita sjúklingum lyf og leysti þá skyldu með því að veita öllum sömu lyf óháð því hvaða sjúkdóm þeir væru með.

Blindrafélagið segir að háttsemi Kópavogsbæjar sé í andstöðu við lög og alþjóðasamninga. Það sé því ljóst að afstaða Kópavogsbæjar sé ólögmæt enda sé lögbundinn skylda þeirra við fatlaða einstaklinga virt að vettugi.