Forseti argentínska sambandins: Messi er besta tían í sögu Argentínu

Julio Grondona, hinn 79 ára gamli forseti argentínska knattspyrnusambandins, og Diego Maradona, fyrrum þjálfari argentínska landsliðsins, eru ekki miklir vinir og hafa verið að skiptast á því að skjóta á hvorn annan.

Treyjunúmer 10 hefur stóran sess í knattspynunni í Argentínu og það er ekki hver sem er sem færað klæðast henni í argentínska landsliðinu. Það hefur ekki verið mikill vafi um það hingað til að Diego Maradona sé besti leikmaðurinn sem hefur spilað í tíunnni hjá Argentínu en Grondona er nú kominn á aðra skoðun.

„Messi er besti leikmaður sem hefur spilað í tíunni í sögu argentínska fótboltans en Messi, Maradona, Riquelme og Veron eru allir út úr þessum heimi," sagði Julio Grondona í útvarpsviðtali í Argentínu en það má vel túlka þetta sem smá skot á Maradona sem sagði Grondona vera orðinn elliæran og vera að missa vitið í viðtali fyrir stuttu síðan.

Grondona réði Maradona sem landsliðsþjálfara Argentínu á sínum tíma en ákvað síðan að semja ekki aftur við hann eftir HM í Suður-Afríku í sumar. Maradona hefur ekki fundið nýja vinnu en tilkynnti það að hann ætla að kæra Grondona yfir ærumeiðandi ummæli um áfengis- og eiturlyfjaneyslu sína. Maradona segist hafa verið edrú í sex ár en Grondona heldur öðru fram.