Fangelsi: Útboðsgögnin verða aðeins birt á íslensku

Útboðsgögn vegna framkvæmda við fangelsið á Hólmsheiði verða að öllum líkindum tilbúin innan mánaðar. Verkið verður boðið út innan EES en öll gögn verða einungis birt á íslensku.

Jón Magnússon, skrifstofustjóri dómsmálaráðuneytisins, segir að slíkt sé venjan hér á landi eftir efnahagshrunið.

„Það er viðtekin venja að hafa textann á íslensku og það er gert samkvæmt öllum reglum,“ segir Jón. Upphafleg kostnaðaráætlun við framkvæmdirnar á fangelsinu hljóðaði upp á 1,5 milljarða króna. Jón segir þó að sú tala hafi hækkað eitthvað, en núverandi áætlun er komin upp í 1,8 milljarða. Hann vonast þó til þess að útboðið gangi á þann veg að talan lækki á ný.

Dönsku arkitektarnir Alex Poulsen unnu fyrstu hönnun fangelsisins og borgaði ráðuneytið 4,8 milljónir fyrir þá vinnu. Það verk var ekki boðið út hér á landi.

„Danir hafa hannað og teiknað mörg fangelsi, en það hafa íslenskir arkitektar ekki gert,“ segir Jón. „Þetta er óveruleg vinna og var eingöngu hugsuð til þess að auðvelda íslenskum arkitektum þá miklu áframhaldandi vinnu sem tekur við eftir útboðið.“

Áframhaldandi hönnunarkostnaður mun sennilega verða mun hærri en tæpar fimm milljónir að mati Jóns og segir hann íslenska arkitekta nú munu taka við málinu alfarið.

Logi Már Einarsson, formaður Arkitektafélags Íslands (AÍ), telur ekkert við bygginguna til þess fallið að íslenskir arkitektar hafi ekki ráðið við það.

„Við teljum ekkert í þessu verkefni vera þannig að það þurfi að leita til útlanda af þeim ástæðum,“ segir Logi. „Við höfum fengið þau svör að það hafi einungis verið takmörkuð ráðgjafavinna sem keypt var frá Danmörku og við vonum bara að svo sé.“

Logi segir óheppilegt hvernig staðið var að verkinu af hálfu ráðuneytisins, en vill þó lenda málinu í góðu og treystir því að framhaldinu verði haldið meðal innlendra arkitekta.

„Aðalatriðið er að þeir gefi íslenskum arkitektum tækifæri á því að keppa um þetta,“ segir hann. „Við erum auðvitað ekki að heimta að fá að teikna fangelsið. En við viljum að sjálfsögðu fá möguleikann til þess.“ sunna@frettabladid.is