Lögreglan mótmælir málflutningi kráareiganda

Fjórum skemmtistöðum var lokað um helgina þar sem fjöldi gesta var yfir hámarki, leyfi vantaði og dyraverðir voru réttindalausir. Formaður félags kráareigenda sendi lögreglu tóninn í dag og sagði aðgerðir lögreglunnar oft á tíðum ólöglegar. Það segir lögreglan alrangt.

„Við lokuðum nokkrum stöðum og fundum að öðrum," segir Ómar Smári Ármannsson, aðstoðaryfirlögregluþjónn hjá Lögreglunni í Reykjavík. „Á einum stað var lokað þar sem 300 gestir voru inni en leyfir fyrir 190. Annar dyravarðanna var leyfilaus og gestir undir aldri."

Ómar segir að á öðrum stað hafi verið 200 gestir inni en aðeins leyfi fyrir 120 auk þess sem dyraverðir hafi verið leyfislausir og vínveitingarleyfi útrunnið. „Þess vegna var staðnum lokað."

„Á þriðja staðnum voru 173 gestir inni en leyfi fyrir 100 og á fjórða staðnum voru 190 gestir inn en leyfir fyrir 90 auk þess sem dyraverðir höfðu ekki tilskylin réttindi."

Ómar segir þetta lýsa ástandinu í bænum og ekki sé að ástæðulausu að lögreglan grípi til aðgerða. „Ef eitthvað kæmi upp á, eldur eða eitthvað slíkt, geta allir séð hvaða afleiðingar það kynni að hafa í för með sér," segir Ómar.

Hann segir málflutning Ófeigs Friðrikssonar formanns félags kráareiganda, sem sagði í samtali við Vísi í dag lögregluna með allt niðrum sig, ekki honum til sóma. Það er svolítið sérstakt að á sama tíma og lögreglan er að vaða inn á skemmtistaðina og gera það sem hún hefur verið að gera, og í sumum tilfellum ekki löglega, er hún með allt niður um sig þegar kemur að löggæslu í miðborginni á nóttunni og um helgar," sagði Ófeigur.

Ómar segir: „Það er eitt af meginmarkmiðum lögreglu að hafa gott samstarf og flestir hafa verið til í það. En umræddur formaður félags kráareiganda hefur í raun verið sá eini sem erfitt hefur verið að hafa samstarf við."

Ómar vill ekki gefa upp nafn staðanna fjögurra, segir mál þeirra í vinnslu og hugsanlegt að þeir verði beittir viðurlögum.