Varð óvænt andlit Stalinskaya vodka

„Þetta var mjög gaman, en ég lék aðalhlutverkið umkringdur föngulegu kvenfólki," segir athafnamaðurinn Halli Hansen. Auglýsing fyrir rúmenska Stalinskaya vodkann var tekin upp á Langjökli í vikunni.

Erlendir framleiðendur unnu verkefnið í samstarfi við íslenska og var búið að finna þrjá leikara, sem áttu allir á einhverjum tímapunkti að fara með aðalhlutverkið. Erlendu framleiðendurnir voru hins vegar aldrei nógu ánægðir með þá, en tóku þá eftir Halla, sem var staðsetningarstjóri (e. location manager) verkefnisins.

„Ég var þarna á tökustað að laga bílinn sem ég var á og það gusast sjálfskiptingarolía yfir andlitið á mér. Þá sáu þeir einhvern veginn að ég væri rétti maðurinn í verkefnið," segir Halli. „Það má því segja að ég sé andlit Stalinskaya vodkans í dag. Þetta kom allt mjög tilviljunarkennt upp. Þeir sáu skemmtilegt blik í auga, gripu andann á lofti og sögðu að ég væri maðurinn sem búið var að leita að allan tímann."

Aðstæður voru mjög erfiðar uppi á jöklinum, en erlendu framleiðendurnir voru ánægðir með íslenska teymið, sem Halli segir að hafi staðið sig gríðarlega vel. Halli er klæddur í selskinn í auglýsingunni, sem hefst á því að hann er að draga hundasleða.

„Svo rekst ég á úlfahjörð, beiti svipunni á þá, tem þá á staðnum og rúlla af stað," segir hann. Bar var komið fyrir inni í íshelli á Langjökli sem Halli brunar inn í með fullan sleða af rúmenska vodkanum. „Og í beinu framhaldi af því skapast einstaklega skemmtilegt og lifandi andrúmsloft á milli mín og kvenfólksins þarna inni," segir Halli að lokum.

„Eins og gerist iðulega þegar aðalsöguhetjan mætir á svæðið."

atlifannar@frettabladid.is