Hafnaði tæpum fimm milljarða þagnarsamningi Musks

Myndin Musk var frumsýnd í dag á kvikmyndahátíðinni í Feneyjum. Heimildarmyndaleikstjórinn Alex Gibney leikstýrir nærri fjögurra klukkustunda langri myndinni og fékk St. Clair til liðs við sig við gerð hennar.

Aðspurð hvers vegna hún hefði samþykkt að taka þátt í gerð myndarinnar um barnsföður sinn sagði hún að henni hefðu verið boðnar 40 milljónir dala (rúmir 4,8 milljarðar íslenskra króna) til þess að tjá sig ekki.

„Þegar þér er boðið slíkt vekur það umhugsun um hversu verðmætt mál þitt er. Hvers vegna að bjóða mér þessa upphæð til að tjá mig ekki?,“ sagði hún á blaðamannafundi er kemur fram í umfjöllun The Independent. Hún bætti við: „Hann [Musk] á almennt flókin sambönd, en flóknasta samband hans er við sannleikann.“

Hún vilji hins vegar setja börnunum sínum það fordæmi að velja sannleikann fram yfir efnisleg þægindi.

St. Clair hefur áður sagt að samband hennar og Musks hafi byrjað á skilaboðasendingum á X, sem þá hét Twitter. Í fyrstu hafi hún ekki haft mikinn áhuga á Musk. Skömmu síðar hafi þau hist í höfuðstöðvum X þegar hún var 24 ára og hann 51.

Seinna meir varð hún ólétt en sér hafi verið skipað að halda barninu leyndu. Eftir að hún eignaðist barnið myndaðist umræða á netinu um að Musk væri faðir þess og St. Clair segir að öfgafullir aðdáendur auðjöfursins hafi byrjað að senda sér hótanir og hótað barni hennar. Í febrúar í fyrra birti hún staðfestingu á faðerni barnsins og bað hún fjölmiðla um að virða einkalíf þess.

Valdi vísvitandi sundrungu

Myndin Musk fjallar að hluta til um yfirtöku auðjöfursins Elons Musk á forritinu X (áður Twitter) og því sem Gibney lýsir sem „algrímsstjórnun“ (e. algorithmic manipulation).

Blaðamaðurinn Zoë Schiffer, sem er einn viðmælenda í myndinni, segir meðal annars Musk hafa breytt algríminu til þess að þagga niður meginstraumsblaðamennsku og ýtt undir ögrandi athugasemdir á miðli sínum.

St. Clair sagði Musk valda vísvitandi sundrungu „sem gæti haft skelfilegar afleiðingar ef hún er ekki undir eftirliti eða hömluð.“

Meðal annarra viðmælenda í myndinni er faðir Musks, Errol Musk, meðstofnandi fyrirtækisins Tesla, Martin Eberhard, og fyrrverandi eiginkona Musks, Justine Wilson.

Talið er að Musk eigi fjórtán börn með fjórum konum. Fimm börn með fyrrnefndri Wilson, þrjú með kanadísku söngkonunni Claire Elise Boucher, eða Grimes, og þrjú með Shivon Zilis, yfirmanni Neuralink, fyrirtækis í hans eigu.