Frávísun í rækjumáli

Héraðsdómur Reykjavíkur hefur vísað frá máli útgerðarfélagsins Ramma gegn íslenska ríkinu. Útgerðarfélagið krafðist þess að viðurkennt yrði með dómi að Jóni Bjarnasyni, sjávar­útvegs- og landbúnaðarráðherra, hafi verið óheimilt að gefa veiðar á úthafsrækja frjálsar á fiskveiðitímabilinu 2010/1011.

Rammi byggði mál sitt meðal annars á því að hann hafi fjárfest í aflahlutdeild fyrir um 3.3 milljarða króna frá árinu 1988. Auk þess hafi fyrirtækið fjárfest í skipum og tækjum vegna veiðanna. Með ákvörðun sinni hafi aflahlutdeild stefnanda verið gerð verðlaus á yfirstandandi fiskveiðiári og verðgildi hennar rýrnað til frambúðar.

Héraðsdómur Reykjavíkur komst að þeirri niðurstöðu að krafa útgerðarfélagsins í dómsmálinu fjallaði ekki um rétt stefnanda í ákveðnu tilviki. Krafan fæli í sér að almennt verði viðurkennt að ráðherranum hafi verið óheimilt að ákveða ekki með reglugerð heildarafla sem veiða megi af úthafsrækju á fiskveiðiárinu. Eins og krafan sé byggð upp hafi útgerðarfélaginu Ramma ekki tekist að sýna fram á að fyrirtækið hafi haft lögvarða hagsmuni af því að fá niðurstöðu dómsins. Því bæri að vísa málinu frá.