Hinsegin vetrarnætur

„Þegar hinsegin gestir koma að utan vilja Íslendingar sjálfkrafa vera með. Ný andlit hafa aðdráttarafl og spennandi fyrir lítið samfélag hinsegin fólks á Íslandi að fá hinsegin ferðamenn til landsins,“ segir Eva María Þórarinsdóttir Lange, sem ásamt unnustu sinni, Birnu Hrönn Björnsdóttur, stendur fyrir vetrarhátíðinni Rainbow Reykjavík dagana 16. til 19. febrúar næstkomandi. Hátíðin er samstarfsverkefni Icelandair, ferðaskrifstofunnar Pink Iceland, Icelandair Hotels, Höfuðborgarstofu og Reykjavík Excursions.

„Hugmyndin að hátíðinni kviknaði hjá þýsku strákapari. Strákarnir urðu strandaglópar í Reykjavík þegar brast á með stórhríð og vonskuveðri í febrúar. Þeim þótti upplifunin svo dásamleg að næsta ómögulegt væri annað en að heimurinn allur vissi af þessum spennandi vetraráfangastað,“ segir Eva María um dauðasta ferðamannatíma ársins, hingað til.

„Febrúar er töfrandi mánuður með norðurljósadansi, sérkennilegri birtu og vetrardýrð, en Íslendingar hafa verið óþarflega feimnir gagnvart eigin veðri og skammdegi. Við skynjum strax að fólk er ánægt með að bjóðast ferð til Íslands á þessum árstíma og viðbrögðin eru strax mikil,“ upplýsir Eva María um viðtökurnar.

Á dagskrá Rainbow Reykjavík eru veislur, norðurljósaferð, hinsegin söguganga, Gullni hringurinn með „Gaysi“ og stórtónleikar í Hörpu þar sem heimsfrægir hinsegin listamenn stíga á stokk.

Eva María, sem einnig er framkvæmdastjóri Gay Pride, segir vetrarhátíðina ekki setta til höfuðs Gay Pride heldur hreina viðbót í flóru hátíðahalds hinsegin fólks.

„Gay Pride er baráttuhátíð hinsegin fólks þar sem stór hluti þjóðarinnar kemur saman yfir hásumarið, en Rainbow Reykjavík er lokaðri og mun minni viðburður sem almenningur hefur ekki aðgang að.“

Á vetrarhátíðinni býðst gestum sérstakur brúðkaupspakki með framlengdri Íslandsdvöl og giftingu frammi fyrir Guði og mönnum.

thordis@frettabladid.is