Cristiano Ronaldo gat ekki æft með portúgalska landsliðinu vegna meiðsla í mjöðm en læknir liðsins er þó vongóður um að hann nái leiknum gegn Íslandi á föstudagskvöldið.
Portúgal hefur ekki efni á að misstíga sig gegn Íslandi en liðið á í harðri barátti við Dani um toppsæti riðilsins í undankeppni EM 2012.
Ronaldo varð eftir á hóteli liðsins í dag vegna meiðslanna en læknir landsliðsins, Heinrique Jones, sagði að þau væru ekki alvarleg.
„Cristiano á í smá vandræðum hægra megin í mjöðminni en við höfum góða stjórn á þessu öllu saman,“ er haft eftir lækninum í spænska blaðinu Marca í dag. „Við ákváðum að leyfa honum að sleppa æfingunni í dag og hann mun æfa einn á morgun.“
„En við þurfum ekki að hafa neinar áhyggjur. Hann mun spila á föstudaginn.“
Cristiano Ronaldo tæpur fyrir leikinn gegn Íslandi
