Ósýnilegi stimpillinn "Dópisti“

Faðir Sigrúnar Mjallar Jóhannesdóttur krefst þess að rannsókn á andláti hennar verði haldið áfram. Sjálfur hefur hann aflað upplýsinga og sent ný sönnunargögn til ríkissaksóknara máli sínu til stuðnings.

Jóhannesi Kr. Kristjánssyni var tilkynnt fyrir mánuði að rannsókn á andláti dóttur hans, Sigrúnar Mjallar ssem lést af banvænum eiturlyfjaskammti í júní á síðasta ári, hefði verið hætt.

„Ég sætti mig ekki við það og fór sjálfur að skoða málið og setti fram fimm atriði sem að mér finnst skipta miklu máli í rannsókninni og hef sent það til ríkissaksóknara. Ég hef líka borið það undir lögmenn og fólk sem hefur starfað í réttarvörslukerfinu í langan tíma, sem eru allir sammála um að þau atriði sem ég nefni í mínu bréfi til saksóknara séu mjög mikilvæg í rannsókninni," segir Jóhannes.

Þau atriði sem Jóhannes nefnir eru nýjar upplýsingar sem hann aflaði sjálfur, en vegna rannsóknarhagsmuna getur hann ekki gefið þær upp. Hann gagnrýnir lögreglu fyrir að hafa ekki unnið vinnu sína sem skyldi og hefur það reynst honum þrautin þyngri að komast til botns í málinu á eigin spýtur

„Það er bara það erfiðasta sem maður getur gert, en jafnframt fyrst að niðurstaða lögreglunnar er þessi, að þeir telja ekki ástæðu til að halda rannsókninni áfram, þá sé ég mig knúinn til þess að gera það. Bæði það að ég vil halda virðingu dóttur minnar á lofti, mér finnst hún eiga að njóta meiri virðingar heldur en það að rannsókninni sé hætt, og líka það að ég vil að þetta hafi varnaðaráhrif út í samfélagið."

Þetta telur hann mikilvægt þar sem fleiri séu ósáttir við það hvernig lögregla rannsakar andlát fíkla.

„Það virðist vera að skýrslurnar séu stimplaðar með stimplinum ósýnilega, dópisti, og þá sé það næg ástæða til þess að rannsaka málið ekki til hlítar," segir hann að lokum.