Koma titrandi og skjálfandi af vestfirskum vegum

Slæmar samgöngur á Vestfjörðum hamla uppbyggingu atvinnulífs og skerða samkeppnishæfni fjórðungsins. Þessi viðhorf eru áberandi hjá atvinnurekendum sem Kristján Már Unnarsson ræddi við á sunnanverðum Vestfjörðum og birtust í fréttum Stöðvar 2.

Kolbrún Pálsdóttir, hótelstýra í Bjarkalundi, segir að lýsingar ferðamanna sem kynnast holóttum vegum og þvottabrettum séu skrautlegar. Þeir komi titrandi og skjálfandi, óttist að fá heilahristing og þakka fyrir að halda nýrunum.

En þetta snýst ekki bara um meiri þægindi í akstri heldur beinharða peninga. Fiskurinn þarf að komast ferskur til Keflavíkur í flug á markaði erlendis, eins og Kristín Magnúsdóttir, framleiðslustjóri Þórsbergs á Tálknafirði, greinir frá. Til þess þurfi góða vegi og svo fiskurinn komist með flutningabílum samdægurs.

Nýtt fiskeldisfyrirtæki í uppbyggingu, Fjarðalax, sér fram á mikla flutninga. Jón Örn Pálsson, svæðisstjóri Fjarðalax, segir að innan tveggja ára þurfi fyrirtækið að flytja 5.000 tonn af fóðri inn á svæðið og 5.000 tonn af fiski á markaði erlendis. Flutningafyrirtækin geti ekki gert lág tilboð nema vegirnir séu góðir og það sé staðreynd að vondir vegir á Vestfjörðum kalli á meira viðhald á bílum. Auk þess skorti mjög á öryggi í flutningum.

Til lítils er að byggja upp ferðaþjónustu allt árið ef vegirnir eru ófærir. Kolbrún segir að Bjarkalundi sé lokað í endaðan nóvember enda séu vegirnir þá venjulega orðnir illfærir.

Keran Ólason, ferðaþjónustubóndi í Breiðavík, trúir ekki öðru en að ríkisvaldið standi við sitt. Umferðin sé að aukast ár frá ári og vegirnir þoli ekki þessa miklu umferð. Það þurfi átak í vegamálum.