Ábyrgðarlaust að afneita fölskum minningum

Reynir Harðarson sálfræðingur ræddi falskar minningar í þættinum Í bítið í morgun. Fyrirbærið hefur verið mikið rætt síðustu daga í kjölfar yfirlýsingar frá fjölskyldu Guðrúnar Ebbu Ólafsdóttur sem sakað hefur föður sinn Ólaf Skúlason biskup um kynferðisbrot gegn sér. Fjölskyldan heldur því fram að Guðrún Ebba fari með rangt mál og þeim möguleika hefur verið velt upp að um falskar minningar sé að ræða.

Reynir segir ekki gott að dæma hvenær um er að ræða falskar minningar og hvenær ekki. „Ég er ekki kominn hingað til að dæma í máli Guðrúnar Ebbu, alls ekki." Hann segist hinsvegar vilja vekja athygli á því að þetta fyrirbæri sé til. „Það væri ábyrgðarlaust að huga ekki að því, sérstaklega þegar minningar koma upp svona löngu eftir meinta atburði."

Reynir segir að bældar minningar þurfi alls ekki að vera falskar. „Manneskjan getur hafa leitt þetta hjá sér, ekki horfst í augu við þetta. Hún gæti hafa gleymt, og síðan rifjast þetta upp aftur. En síendurtekið ofbeldi árum og áratugum saman, það er stór biti að kyngja því að þetta geti horfið."

Reynir fór síðan yfir sögu fyrirbærisins í fróðlegu spjalli við Heimi og Kollu. Hlustið hér.