Rokkararnir í Cliff Clavin koma sér á kortið í Bretlandi

Strákarnir í rokkhljómsveitinni Cliff Clavin eru nýkomnir heim eftir myndatöku hjá breska tímaritinu Kerrang! Mikill heiður, að mati söngvarans Bjarna Þórs Jenssonar.

Rokkhljómsveitinn Cliff Clavin er nýkomin heim frá Bretlandi þar sem hún sat fyrir í myndatöku hjá þungarokkstímaritinu vinsæla Kerrang! Þetta er í fyrsta sinn sem sveitin situr fyrir hjá erlendu tímariti. „Þetta blað er með meira af þyngri hljómsveitum en það er mikill heiður að fá að vera þarna. Ef þetta verður á sýnilegum stað og á heilli blaðsíðu þá verður það rosalega skemmtilegt,“ segir söngvarinn Bjarni Þór Jensson. „Það er mjög gott að fá svona umfjöllun og þarna erum við að brjóta ísinn. Við fórum í gott

myndatökuprógramm og þetta kemur vonandi vel út.“ Cliff Clavin gaf út sína fyrstu plötu fyrir síðustu jól sem nefnist The Thief’s Manual og fékk hún fínar viðtökur hjá íslenskum rokkáhugamönnum. Hljómsveitin spilaði á Kerrang!-kvöldi á Iceland Airwaves hátíðinni síðasta haust og fékk fjórar stjörnur í breska tímaritinu fyrir frammistöðu sína. Sú umfjöllun lagði grunninn að myndatökunni sem fór fram í síðustu viku. Bjarni og félagar nýttu tækifærið á milli ljósmyndatakanna og spiluðu á tvennum tónleikum, þeim fyrstu síðan þeir spiluðu í úrslitum alþjóðlegu hljómsveitakeppninnar Global Battle of the Bands.

Annar staðurinn er hefðbundinn tónleikastaður sem heitir Wheelbarrow og er í Camden-hverfinu. Hinn staðurinn var í Mayfair, sem er eitt ríkasta hverfi London. „Það var mjög einkennilegt gigg. Þarna voru einhverjar „showgirls“ gellur að dansa. Þetta var mjög skrítið allt saman en svona verða sögurnar til,“ segir Bjarni Þór hress. Hann vonast til að áframhald verði á ferðalögum Cliff Clavin til Bretlands. „Vonandi förum við út fljótt aftur og reynum að byggja góðan grunn. Það er ekkert sem er að stoppa okkur í því nema hvað þetta er dýrt.“freyr@frettabladid.is