Almannavarnir: Varað við stormi um allt land

Almannavarnadeild ríkslögreglustjóra vill vekja athygli á því að Veðurstofan varar við stormi um allt land og talsverðri ofankomu norðaustanlands.

Í tilkynningu frá Almannavörnum segir að spáin gildi til klukkan 18:00 á morgun. Hún er svohljóðandi: „Norðaustan og síðan norðan 13-23, hvassast austanlands, með éljagangi N- og A-til, en skýjað að mestu syðra. Norðan 18-28 seint í kvöld og snjókoma um norðanvert landið. Lægir talsvert á Austurlandi upp úr miðnætti. Norðaustan 10-18 síðdegis á morgun og él N- og A-lands. Frost 3 til 15 stig, kaldast inn til landsins. Hiti kringum frostmark með A- og S-ströndinni á morgun."

Nú þegar er farið að hvessa víða norðanlands og austan og útlit fyrir að bæti í vind í dag en að veðrið verði verst frá miðnætti.

Þá má búast við sterkum vindhviðum sunnan fjalla svo sem á Snæfellsnesi, á Kjalarnesi, undir Eyjafjöllum, við Lómagnúp, í Öræfum og svo áfram þaðan austur og norður með ströndinni.

Að endingu er bent á að nú er stórstreymt og verður morgunflóðið í Reykjavík kl. 07:00 í fyrramálið og er sjávarstöðu spáð í 4,16 metrum að áhlaðanda meðtöldum. Á Húsavík verður sjávarstaðan hæst á kvöldflóðinu í kvöld en það verður um miðnættið, þá er spáð að áhlaðandi verði um 40 sentimetrar og sjávarstaða verði í 1,63 metrum. Háflóð á Raufarhöfn verður um kl. 02 í nótt.