Undarleg samsuða „af vændi og barnasölu“

„Með því að borga konu fyrir að ganga með barn er því verið að búa til undarlega samsuðu af vændi og barnasölu. Vændi í þeim skilningi að verið er að kaupa afnot af líkama annarrar manneskju og barnasölu því barnið er jú selt." Þetta segir Halla Gunnarsdóttir, aðstoðarmaður Ögmundar Jónassonar innanríkisráðherra, í pistli sem hún skrifar á vefsíðu sína árið 2007. Halla var ekki aðstoðarmaður Ögmundar þegar þessar línur voru ritaðar.

„Í umræðum um staðgöngumæðrun er gerður greinarmunur á því að t.d. náin vinkona eða systir sé fengin til þess að ganga með barnið og að konu sé borgað fyrir að "sjá um starfið". Ef við viljum heimila það síðarnefnda er um barnasölu að ræða enda aðeins stigsmunur á því að selja barn með öðrum genum og hreinlega að sjá viðskiptatækifæri í því að fæða börn og selja þau," skrifar Halla einnig á vefsíðuna fyrir þremur árum.

DV.is rifjaði upp þessi skrif Höllu fyrr í dag þar sem bent er á að viðhorf hennar til staðgöngumæðrunar kunni að vekja athygli þar sem hún er aðstoðarmaður þess ráðherra sem hefur með málaflokkinn að gera hér á landi.

Mál Jóels Færseth, lítils drengs á Indlandi sem íslensk hjón eignuðust með aðstoð indverskrar staðgöngumóður, hefur vakið mikla athygli að undanförnu Innanríkisráðuneytið hefur þó ekki enn gefið út vegabréf fyrir Jóel þannig að hann geti komið til Íslands, en Alþingi honum íslenskan ríkisborgararétt í lok síðasta árs.

Í yfirlýsingu sem ráðuneytið sendi frá sér fyrr í vikunni segir að íslensk yfirvöld bíði enn eftir svari við erindi til indverskra yfirvalda þar sem óskað er upplýsinga sem ætlað er að greiða úr óvissu um réttarstöðu barnsins, hvort íslenskum hjónin fari með forsjá þess samkvæmt indverskum lögum og hvernig indversk yfirvöld skilgreina ríkisfang barnsins.

Á vef innanríkisráðuneytisins er að finna hagnýtar upplýsingar um álitaefni þegar kemur aðstaðgöngumæðrun.

Þar kemur fram að í flestum tilvikum leikur lítill vafi á því hverjir eru foreldrar barns, hvaða ríkisfang barn fær við fæðingu og til hverra barn eigi tilkall samkvæmt framansögðu. Á því eru þó undantekningar, eins og dæmi Jóels sýnir.

Bent er á að íslensk yfirvöld eru aðilar að Sameinuðu þjóðanna um réttindi barnsins en í honum er kveðið á um réttindi barnsins í margvíslegu tilliti.

Þegar blaðamaður Vísis hafði samband við Höllu sagðist hún ekki geta tjáð sig um þetta einstaka mál. Hún ætlar heldur ekki að reka umræðu um staðgöngumæðrun í fjölmiðlum en útilokar ekki að hún skrifi annan pistil á vef sinn um málið. Það verði þó að koma í ljós.

Tenglar:

Pistill Höllu frá 2007 í heild sinni

Hagnýtar upplýsingar innanríkisráðuneytisins um staðgöngumæðrun