Farið inn í ólæsta bíla og íbúðir á Akureyri

Undanfarna daga hafa borist þó nokkrar tilkynningar til lögreglunnar á Akureyri um að farið hafi verið inn í ólæstar bifreiðar og húsnæði víða um bæinn. Að sögn lögeglu hefur verið rótað í bifreiðum og í því húsnæði sem farið hefur verið inn í en litlum verðmætum stolið.

Ekki hefur verið um innbrot að ræða í þessum tilvikum heldur einungis farið inn þar sem fólk hefur ekki læst bifreiðum eða híbýlum sínum. Lögregla leitar þeirra sem voru að verki og minnir fólk á að læsa bifreiðum sínum og híbýlum og vera á varðbergi gagnvart grunsamlegum mannaferðum.

Verði einhver var við slíkt skal hafa þegar samband við lögreglu í síma 464 7700 eða í gegnum Neyðarlínuna í 112.