Neymar sér ekki eftir því að hafa hafnað Chelsea

Brasilíska undrabarnið Neymar segist ekki sjá eftir því að hafa hafnað tilboði frá Chelsea en hann skrifaði nýverið undir nýjan langtímasamning við Santos í heimalandinu.

Hann segist þó gjarnan vilja spila í Evrópu í framtíðinni en núverandi samningur hans við Santos rennur út árið 2014. Hann er einungis nítján ára gamall og hefur sagður vera efnilegasti knattspyrnumaður heims.

Real Madrid, Barcelona og fleiri stórlið í Evrópu hafa áhuga á að kaupa kappann en hann er ánægður á heimaslóðum.

„Ég sé ekki eftir neinu. Ég ákvað að halda kyrru fyrir í mínu heimalandi og mér finnst það rétt ákvörðun,“ sagði hann í viðtali við tímaritið France Football.

„Ef ég hefði farið til Chelsea í sumar hefði ég ekki unnið Copa Libertadores með Santos, titli sem félagið hefur beðið eftir í hálfa öld.“

„Ég vil vera áfram í Santos. Ég þakka þessum stórliðum sem hafa sýnt mér áhuga fyrir en ég tók þessa ákvörðun og stend við hana.“