Mótmæla harðlega niðurskurði til Strætó

Fulltrúar Sjálfstæðisflokksins í umhverfis- og samgönguráði Reykjavíkur mótmæltu harðlega þeim niðurskurði sem verður á fjárveitingum til Strætó á þessu ári.

Sjálfstæðismenn segja að í fjárhagsáætlun borgarinnar séu framlög Reykjavíkur til Strætó bs. skorin niður um rúm 5%, sem hafi kallað á umtalsverða fargjaldahækkun og muni leiða til verulegrar skerðingar á þjónustu innan fárra vikna. Strætó muni byrja akstur síðar á morgnana og hætta akstri fyrr á kvöldin. Þjónusta um helgar verði einnig skert verulega.

„Það er einkennilegt viðhorf til almenningssamgangna að skerða þjónustuna og hækka gjöldin, á sama tíma og borgarbúar kalla eftir aukinni þjónustu, einsog komið hefur fram í könnunum," segir Gísli Marteinn Baldursson fulltrúi Sjálfstæðisflokksins í umhverfis- og samgönguráði í tilkynningu til fjölmiðla. „Sérstaklega er það einkennilegt í ljósi þess að allir flokkar lofuðu borgarbúum bættum almenningssamgöngum með aukinni tíðni, en ekki minnkaðri eins og nú verður raunin," segir Gísli.