Yfirmaður hjá ISAVIA í leyfi vegna kynferðislegrar áreitni

Starfsmaður ISAVIA sem var fundinn sekur um kynferðislega áreitni gagnvart samstarfskonu sinni er kominn í leyfi.

Samkvæmt upplýsingum frá ISAVIA var um að ræða sameiginlega ákvörðun stjórnenda fyrirtækisins og hans. Stjórnendur ISAVIA íhuga nú hvort málinu verði áfrýjað, eða hver næstu skref í málinu eiga að vera. Maðurinn verður í leyfi þangað til.

ISAVIA var dæmt í Héraðsdómi Reykjaness í gær til að greiða konu miskabætur vegna kynferðislegrar áreitni. Upphaf málsins má rekja til þess að konan fór með tveimur yfirmönnum, framkvæmdastjóra sinnar deildar og svo yfireftirlitsmanni með öryggisatriðum fyrirtækisins, í vinnuferð í sumarbústað í Grímsnesi. Henni var tjáð að í ferðinni ætti að ræða um breytingar á starfi hennar.

Um kvöldið reyndu mennirnir að fá konuna með sér ofan í heitan pott og tók konan þá eftir því að annar mannana var nakinn. Hún lokaði sig inn í herbergi. Síðar um kvöldið ruddist framkvæmdastjórinn inn í herbergið og bað konuna um að taka í hönd sina. Ekki voru gerðar athugasemdir við hegðun hins mannsins, sem fór íklæddur skýlu í pottinn.

Rétt er að taka fram að ISAVIA var ekki starfandi þegar dómurinn átti sér stað, heldur vann fólkið hjá Keflavíkurflugvelli, sem varð síðar að ISAVIA, eftir sameiningu við Flugstoðir.