Engar tölur til um brjóstastækkanir

Landlæknisembættið hefur engar tölulegar upplýsingar um fjölda brjóstastækkana, né annarra fegrunaraðgerða, sem framkvæmdar eru hér á landi.

Samkvæmt lögum um Landlækni frá árinu 2007 skal embættið halda skrá yfir allar aðgerðir sem gerðar eru, hvort sem þær eru framkvæmdar á einkareknum læknastofum, heilsugæslum eða sjúkrahúsum.

Geir Gunnlaugsson landlæknir segir að verið sé að kalla eftir upplýsingunum frá læknastofunum, en það taki tíma að fá tölurnar og vinna úr þeim.

„Það er sannarlega markmið okkar að hafa eins gott yfirlit yfir allar aðgerðir og hægt er. Við erum að reyna að byggja upp kerfið á rafrænni skráningu, sem er eitt af okkar stöðugu baráttumálum,“ segir Geir. „En við höfum sett fram tilmæli til læknastofa um þessar skráningar.“

Geir segir markmið embættisins að halda skrá yfir sjúkrasögur í rauntíma en slíkt krefjist mikilla fjárfestinga í rafrænum kerfum.

„Ég vil geta sagt núna hversu margar brjóstastækkanir voru framkvæmdar í janúar 2011,“ segir Geir. „Eina vandamálið við sjálfstætt starfandi lækna er að þeir eru með mjög mismunandi rafræn kerfi. Hver og einn hefur sínar hugmyndir um það hvernig standa eigi að skráningu og umfang aðgerða er mjög misjafnt eftir læknum.“

Geir segir að sérstaklega erfitt sé að ná utan um upplýsingar þar sem þátttaka Sjúkratrygginga Íslands sé engin, eins og í fegrunaraðgerðum. Þar sé einungis um að ræða viðskipti á milli þess einstaklings sem sæki þjónustuna og þess læknis sem framkvæmi hana. Ríkið og skattpeningar komi þar hvergi nærri.

Komi upp vandamál hjá konum eftir brjóstastækkanir leita þær þó í flestum tilvikum á ríkisrekin sjúkrahús eða heilsugæslur og fá þar viðeigandi meðferðir. SÍ taka þó ekki þátt í lækniskostnaði vegna leka í silíkonpúðum.

Þórdís Kjartansdóttir lýtalæknir segir ekki alla vera sammála um að opinbera eigi tölur um fjölda fegrunaraðgerða.

„Þó að landlæknir geti kannski lagalega kallað eftir þessum upplýsingum kemur á móti trúnaður læknis og sjúklings,“ segir Þórdís. „Þar að auki vantar opinbera vinnuferla um hvað eigi síðan að gera við þessar upplýsingar og hvaða tilgangi þær þjóna. Trúnaður læknis og sjúklings má ekki gleymast.“sunna@frettabladid.is