Fundu stóran smokk í Vestmannaeyjahöfn

Áttatíu sentimetra langur beitusmokkfiskur veiddist í höfninni í Vestmannaeyjum á sunnudagskvöld. Talið er að dýrið hafi verið í smokkfiskatorfu sem fór hjá Vestmannaeyjum en það orðið af einhverjum ástæðum viðskila við hana. Smokkfiskurinn var vankaður þegar hann fannst við höfnina, synti fram og aftur þar sem grunnt var og brást hægt við þegar hann var fangaður.

Nokkurn fjölda fólks bar að bryggjunni til að fylgjast með smokkfisknum. Haft var samband við þá sem taldir voru þekkja til smokkfiska. Komið var með tvo háfa og lítið kar undir smokkfiskinn. Hann var fangaður, settur í kar og fluttur á Fiska- og náttúrugripasafn Vestmannaeyja. Þar var hann settur í búr.

Páll Marvin Jónsson, framkvæmdastjóri Þekkingarseturs Vestmannaeyja, sem rekur safnið, segir smokkfiskinn hafa verið fallegan á að líta og áhugavert að sjá hversu hratt hann skipti litum eftir birtustigi í búrinu á safninu. Hann hafi farið frá því að vera brúnleitur í að verða ljós yfirlitum. Páll segir ekki nýtt að smokk­fiskur veiðist við Vestmanna­eyjar. Nýlunda sé hins vegar að hann sjáist í höfninni.

Vonir stóðu til að dýrið næði að lifa eitthvað. Þær vonir urðu að engu en smokkurinn drapst í búri sínu um nóttina. Páll segir Náttúrugripasafnið vanta búr fyrir miðsjávardýr á borð við smokkfiska. Hann telur dýrið ekki hafa átt langt eftir og af þeim sökum orðið viðskila við smokkfiskatorfuna. Það sé sömuleiðis ástæða þess að dýrið hafi verið vankað og villst inn í höfnina í Vestmannaeyjum.

Ekki liggur fyrir hvað gert verður við hræið af smokkfiskinum. Ekki er ólíklegt að hann verði fæða krabba á safninu.

jonab@frettabladid.is