Þremenningar játa sjötíu innbrot - tveir þeirra eru 17 ára

Þrír útlendingar sem búa á landsbyggðinni hafa játað að hafa framið um sjötíu innbrot hér á landi á síðustu mánuðum.

Í byrjun október síðastliðinn fór að bera á aukningu innbrota í heimahús á höfuðborgarsvæðinu. Þau voru framin með svipuðum hætti og virtust þjófarnir helst hafa áhuga á skartgripum. Fyrstu innbrotin voru framin í Kópavogi og Breiðholti en færðust svo yfir til Hafnarfjarðar og Garðabæjar. Upplýsingar voru sendar íbúum á vef lögreglu þann 14. desember þar sem varað var við innbrotsþjófum og íbúar hvattir til að láta lögreglu vita yrðu þeir grunsamlegra mannaferða varir.

Þetta kemur fram í tilkynningu frá lögreglu.

Grunur beindist að ákveðnum mönnum og voru þeir yfirheyrðir án þess að niðurstaða fengist. Laugardaginn 15. janúar var einn þessara manna handtekinn vegna gruns um innbrot í heimahús í Mosfellsbæ. Hann var í framhaldinu úrskurðaður í viku gæsluvarðhald. Tveir menn voru handteknir í kjölfarið sem taldir voru meðsekir. Þeir voru úrskurðaðir í gæsluvarðhald einnig.

Þremenningarnir, tveir 17 ára piltar og 23 ára karlmaður, útlendingar búsettir hér á landi, hafa sætt varðhaldi óslitið frá þeim tíma. Þeir hafa játað rúm fimmtíu innbrot í heimahús á höfuðborgarsvæðinu, þau fyrstu framin fyrir tveimur árum síðan, og vel á annan tug innbrota í hótel og gistiheimili. Samtals liggja því fyrir játningar á um sjötíu innbrotum.

Rannsókn þessara mála hefur verið mjög umfangsmikil af hálfu lögreglu en á þriðja tug manna hafa komið að henni með einum eða öðrum hætti. Rannsókn stendur enn yfir. Athygli er vakin á því að lögreglan mun setja sig í samband við brotaþola á næstu dögum varðandi bótakröfur meðal annars.