Bæjarfulltrúar biðja Ísfirðinga afsökunar

Umhverfisnefnd Alþingis hefur falið Ólínu Þorvarðardóttur alþingismanni að hafa umsjón með endurskoðun löggjafar um upplýsinga- og viðbragðsskyldu stjórnvalda til að kanna hvaða þátt veilur í lögum kunni að hafa haft í Funamálinu. Bæjarfulltrúar, bæði í meiri- og minnihluta, báðu íbúa afsökunar á andvaraleysi sínu á fundi bæjarstjórnar á miðvikudag.

Umhverfisnefnd fjallaði um Funamálið í gærmorgun að frumkvæði Ólínu en henni innan handar við endurskoðun laganna verða nefndarritari umhverfisnefndar ásamt öðrum lögfræðingum þingsins.

Í fréttatilkynningu nefndarformanns, Marðar Árnasonar, segir að fara eigi yfir löggjöfina „og athuga hvaða þátt veilur í lögum kunna að eiga í þeim mistökum sem nú eru augljós". Ólína hyggst skila áliti á nefndarfundi fyrir lok janúarmánaðar.

Ólína segir fundinn hafa verið góðan í alla staði og mikið af upplýsingum hafi komið fram. Þá hafi rangfærslur verið leiðréttar. „Nefndin tekur þetta mál mjög alvarlega. Niðurstaða fundarins er sú að fara yfir þá lagabálka sem eiga við um upplýsingaskyldu stjórnvalda gagnvart mengun og umhverfisáhrifum. Eins lög sem gilda um starfsleyfi fyrirtækja, hollustuhætti og aðbúnað og heilsuvernd almennings." Ólína segir að allt stefni í að umhverfisnefnd geri sjálf tillögur um lagabreytingar.

Málefni Funa voru til umræðu á fundi bæjarstjórnar Ísafjarðar á miðvikudag.

Bæjarfulltrúar Í-listans lögðu fram bókun þar sem lýst er „þungum áhyggjum af þeirri mengun sem sýnt er að komið hefur frá sorpbrennslunni Funa á undanförnum árum. Sérstaklega séu upplýsingar um díoxínmengun í útblæstri Funa og í mjólkurafurðum frá Engidal áfall fyrir íbúa Skutulsfjarðar og trúnaðarmenn almennings í sveitarfélaginu. Í-listinn leggur til að Ísafjarðarbær óski eftir því við heilbrigðisyfirvöld að þau láti nú þegar fara fram rannsókn á heilsufari allra starfsmanna Funa og íbúa í innsta hluta Skutulsfjarðar."

Gísli H. Halldórsson, forseti bæjarstjórnar, lagði fram bókun meirihluta bæjarstjórnar. Þar harmar meirihlutinn þá stöðu sem upp er komin. Gísli sagði á fundinum að honum hefði ekki verið kunnugt um mengunina. „Ég get tekið undir með bæjarfulltrúum Í-listans að ef mér hefði verið ljós alvarleiki þessa máls hefði ég gripið það fegins hendi að loka stöðinni strax."

svavar@frettabladid.is