Vonast til að ná takmarkinu strax í janúar

„Miðað við þann gang sem hefur verið í söfnuninni ætti þetta að klárast í janúar,“ segir Guðmundur Felix Grétarsson, sem vantar nú aðeins um fjórar milljónir af þeim fjörutíu sem hann hyggst nota til að verða sér úti um handaágræðslu í Lyon í Frakklandi.

„Ég er að detta í níutíu prósent, þetta er búið að ganga alveg ótrúlega vel,“ segir Guðmundur Felix, sem missti báðar hendurnar í vinnuslysi fyrir þrettán árum.

Þegar nægt fé hefur safnast mun Guðmundur flytja til Frakklands og getur þá skráð sig á biðlista eftir nýjum handleggjum. „Ég er búinn að selja íbúðina mína og flyt út úr henni í lok janúar. Þá fer ég til foreldra minna þangað til ég fæ kallið um að fara út. Það er einn á undan mér, Ítali sem er að fá framhandlegg, og hann fer á biðlista í janúar, febrúar. Um leið og hann er búinn get ég flutt út til Lyon.“

Söfnunin hefur gengið vonum framar og Guðmundur treystir á að afgangurinn skili sér fljótlega. Hann segir að minnt sé á söfnunina með dreifimiða sem fylgi Fréttablaðinu í dag.

Guðmundur hefur verið í stífu frönskunámi og hyggst halda því áfram þegar út verður komið. Þar er ómögulegt að segja til um hve löng biðin verður. „Þeir segja að þetta geti tekið frá viku og upp í tvö ár. Einn daginn deyja margir og næsta dag deyr enginn.“- sh