Heiðra minningu Hermanns

„Þetta verða stærstu X-mas tónleikar frá upphafi,“ segir Úlfar Linnet, einn vina Hermanns Fannars Valgarðssonar sem féll frá langt fyrir aldur fram í byrjun nóvember.

Hinir árlegu X-mas tónleikar X-ins verða að þessu sinni styrktartónleikar í minningu Hermanns, og verða haldnir í Kaplakrika hinn 20. desember næstkomandi.

Allur ágóði mun renna óskertur til fjölskyldu Hermanns, en hann starfaði um árabil á útvarpsrásinni. Vinir og samstarfsmenn Hermanns sjá um alla skipulagningu og hafa fengið margar stærstu hljómsveitir landsins til að koma fram á tónleikunum.

„Skipulagningin hefur gengið rosalega vel og þetta verður frábært kvöld. Það er náttúrulega vegna þess að Hermann hafði svo góða nærveru og svo mörgum þótti vænt um hann sem svona margir vilja hjálpa til við þetta,“ segir Úlfar.

Á meðal þeirra sem taka þátt er íþróttafélagið FH sem gefur afnot af Kaplakrika fyrir tónleikana, en Hermann var mikill stuðningsmaður liðsins. Listamennirnir sem munu heiðra minningu Hermanns eru meðal annars Mugison, Hjálmar, Of Monsters and Men, Dikta og Jón Jónsson.

„Þetta verða frábærir tónleikar og gott tækifæri til að koma saman fyrir jólin og einfaldlega njóta þess að vera saman og hlusta á góða tónlist.“

Miðaverð er 2.000 krónur og miðasala fer fram á midi.is og í verslunum Brims og Maclands. - bb