Þrjóskast við að þróast

Hinn léttgeggjaði Dave Mustaine er kominn á kreik á ný með þrettándu breiðskífu Megadeth. Ýmislegt kom upp á við gerð plötunnar, sem var þó tekin upp á mettíma.

Þungarokksveitin Megadeth sendi frá sér þrettándu breiðskífu sína 1. nóvember. Platan heitir TH1RT3EN og hefur fengið góðar viðtökur gagnrýnenda, sem keppast við að birta um hana jákvæða dóma.

Vinna við plötuna hófst í janúar á þessu ári og í júní mætti Dave Mustaine, forsprakki Megadeth, í viðtal á tónlistarsíðunni Puregrainaudio.com og sagði að platan væri allt öðruvísi en síðasta platan Endgame, sem fékk einnig góðar viðtökur hjá gagnrýnendum. „Platan er hundrað prósent öðruvísi," sagði Mustaine. „Hún er ólík öllu öðru sem við höfum gert vegna þess að gítarinn hljómar öðruvísi, hann hljómar ofur-nútímalega." Þá lýsti Mustaine hljómnum sem upprunalegu Black Sabbath blönduðu við nútímalegra rokk á borð við Queens of the Stone Age.

Þrettán hefur aldrei verið talin happatala, en ýmislegt kom upp á við gerð plötunnar, samkvæmt Mustaine. Í viðtali við tímaritið Terrorizer sagðist hann hafa lent í vandræðum með bíla ásamt því að hlutir hurfu. „Og einn af pottþéttustu náungum sem ég þekki féll og hvarf," sagði Mustaine. Þá sagði hann á Twitter-síðu sinni þegar hljómsveitin var í hljóðveri að hlé yrði að gera á upptökum vegna þess að upptökustjórinn hefði veikst. Mustaine hefur aldrei verið talinn vera í góðu jafnvægi og sagði síðar í viðtali, þvert á fyrri yfirlýsingar, að mikil heppni fylgdi tölunni 13 og að platan hefði verið tekin upp á mettíma.

Það er þó varla heppni að platan sé að fá fínustu dóma. Á vefsíðunni Metacritic.com er platan með 74 af 100 mögulegum í meðaleinkunn. Tímaritin Spin, Rock Sound og Revolver gefa öll plötunni þrjár og hálfa stjörnu af fimm mögulegum og gagnrýnandi Spin segir að þrjóskan við að þróast geri tónlist Megadeth stórskemmtilega.

atlifannar@frettabladid.is