Framtíðarsýn á Þingvelli í hugmyndaleit

Þingvellir Mikil áhersla er á uppbyggingu veitinga- og veisluaðstöðu í mörgum þeirra 102 tillagna sem bárust í hugmyndasamkeppni um þróun þjóðgarðsins á Þingvöllum. Sumir telja mikilvægara að fækka mannvirkjum í friðlandinu.

„Óskað var eftir hugmyndum almennings um hvernig taka megi á móti þeim þúsundum Íslendinga og erlendra gesta sem á ári hverju vilja upplifa sérstöðu Þingvalla, án þess að ganga á tækifæri komandi kynslóða til að njóta staðarins," segir í skilgreiningu Þingvallanefndar á hugmyndaleitinni. Sýning á tillögunum hófst á þriðjudag í Ráðhúsinu í Reykjavík.

Meðal þeirra sem eiga tillögur eru Steingrímur J. Sigfússon fjármálaráðherra og Hjörleifur Guttormsson, fyrrverandi iðnaðarráðherra. Steingrímur leggur til að ekki verði byggt á Valhallarreitnum að nýju heldur verði aðstaða til að slá upp samkomutjöldum sem taka megi niður að notkun lokinni hverju sinni. Hjörleifur gagnrýnir Þingvallanefnd harðlega fyrir að hafa ekki hafist handa við að fjarlægja sumarbústaði úr þjóðgarðslandinu heldur þvert á móti fest þá í sessi með nýjum lóðarleigusamningum til tíu ára.

Eiríkur Bridde stingur upp á nýstárlegum sýningarskála á Valhallarreitnum sem yrði hálfniðurgrafinn eins og „álfhóll" og að þangað væri hægt að komast með kláfi ofan af Hakinu. Hjörleifur Stefánsson arkitekt og Ómar Ragnarsson sjónvarpsmaður eru einnig meðal þeirra sem eiga tillögur.

Margir nefna bætta göngustíga. Að minnsta kosti tveir vilja að boðnar verði útsýnissiglingar um Þingvallavatn á glerbytnu og jafnvel loftpúðaskipi. Þá eru nefndar kajakleiga og hestaferðir. Í einni tillögu er sett fram sú hugmynd að risavaxin stytta verði reist í líki landvættar og að samhliða verði reistar landvættastyttur í öðrum landshlutum. Einn leggur til að veitingasala verði í gamla Þingvallabænum og forsætisráðherra verði fundinn annar bústaður á friðsælli stað.

Dómnefnd undir forystu Rögnu Árnadóttur, fyrrverandi dómsmálaráðherra, fór yfir tillögurnar. Á föstudag kemur í ljós hvort einhverjar þeirra hljóta 200 þúsund krónur í viðurkenningarskyni. Dómnefndinni er heimilt að veita fimm slíkar viðurkenningar.

gar@frettabladid.is