164 milljarða afskriftir

Fjármálafyrirtæki höfðu í lok ágúst afskrifað lán til einstaklinga um 163,6 milljarða króna. Niðurfærsla vegna hinnar svokölluðu 110 prósenta leiðar nemur um 27,2 milljörðum en enn eru fimm þúsund mál í vinnslu. Þá nemur niðurfærsla vegna sértækrar skuldaaðlögunar tæpum 5,6 milljörðum króna en 600 mál eru enn í vinnslu.

Þetta kemur fram í tölum sem Samtök fjármálafyrirtækja (SFF) sendu frá sér í gær. Tölurnar eru í samræmi við tölur sem birtust í Þjóðhagsáætlun 2012 sem Árni Páll Árnason, efnahags- og viðskiptaráðherra, lagði fyrir Alþingi í síðustu viku.

Í tilkynningu Samtaka fjármálafyrirtækja kemur einnig fram að fjármálafyrirtæki landsins höfðu lokið endurútreikningi á 70 þúsund gengistryggðum lánum í lok ágúst. Þar af voru rúm 12.700 fasteignalán og 57 þúsund bifreiðalán. Heildarniðurfærsla fasteignaveðlána vegna endurútreiknings var rúmir 92 milljarðar króna og heildarniðurfærsla bifreiðalána um 38,4 milljarðar króna.

Í tilkynningunni frá SFF kom einnig fram að í eldri tölum frá samtökunum var niðurfærsla vegna endurútreiknaðra bílalána ofmetin um rúma tvo milljarða króna.

- mþl