Vilja svipta ábúanda leyfi til búfjárhalds

Starfshópur innan Samtaka lífrænna neytenda hefur sent áskorun til yfirvalda og eftirlitsaðila um að fara að lögum og beita öllum tiltækum úrræðum til að stöðva og koma í framtíðinni í veg fyrir langvarandi illa meðferð búfjár á bænum Stórhóli í Álftafirði sem og hjá öðrum, sem grunaðir eru um eða hafa orðið uppvísir að illri meðferð dýra.

Dómsmál á hendur ábúendum Stórhóls var tekið fyrir í Héraðsdómi Austurlands í gær, en þeir hafa verið ákærðir fyrir vanhirðu sauðfjár, eins og Fréttablaðið hefur greint frá.

Þetta er í annað sinn sem ábúandinn á Stórhóli er ákærður fyrir sömu sakir. Í desember árið 2009 lauk fyrra málinu með dómssátt og ákvað ákæruvaldið að sekta bóndann um áttatíu þúsund krónur.

Starfshópurinn minnir á tilgang laga um dýravernd og búfjárhald og undirstrikar að hann virði ákvæði laga um sjálfstæði og hlutleysi dómstóla. „Við leyfum okkur engu að síður og af marggefnu tilefni ýmissa dómstóla, sem beitt hafa refsiviðurlögum … vegna alvarlegra brota á lögum um dýravernd, að beina því sérstaklega til Héraðsdóms Austurlands að sjónarmiðum um tilgang og markmið framangreindra laga um hagsmunagæslu dýra verði beitt þegar dómstóllinn tekur ákvörðun um það hvort viðkomandi ábúendum verði bannað að halda búfé eins og krafist mun vera í nýlegri ákæru lögreglustjórans á Eskifirði gagnvart ábúanda," segir í áskoruninni.

Starfshópurinn segir gögn í málinu hafa sýnt fram á að ábúendur hafa á umliðnum árum ítrekað þverbrotið fyrrnefnda löggjöf og „jafnframt orðið berir að skelfilegri meðferð búfjár, sem valdið hefur varnarlausum dýrunum miklu og langvarandi kvalræði. …Af verknaðarlýsingum og fjölda gagna, sem varða slæma meðferð búfjár á umræddum stað síðastliðin 11 ár er ekki hægt að draga aðra ályktun en að um stórfelld og ítrekuð brot hafi verið að ræða hjá sakborningum og því hljóti lagaskilyrði að vera uppfyllt til að svipta viðkomandi leyfi til búfjárhalds," segir enn fremur.

Loks bendir hópurinn á að þrátt fyrir brotin njóti ábúendur óskertra opinberra styrkja til búrekstursins. Þannig séu skattgreiðendur látnir, á óbeinan hátt, styðja við og stuðla að áframhaldandi illri og siðlausri meðferð búfjárins.jss@frettabladid.is

Úr ákæru lögreglustjórans á Eskifirði

Ábúandinn á Stórhóli er meðal annars ákærður fyrir að „halda of margt fé í fjárhúsum á bænum, en þar töldust vera 764 ær á húsum þó einungis væri húsakostur fyrir 684 ær.

Fyrir að … hafa gefið ánum of lítið hey eða af lélegum gæðum, með þeim afleiðingum að hluti fjárins var vanfóðraður. Enn fremur að hafa látið hjá líða að reyna lækningu eða aflífa veika og slasaða gripi á bænum er í ljós kom að lamb var með stóran skurð á kviði og annað heltekið liðabólgu…"

Fyrir að „…hafa vanrækt að tryggja góðan aðbúnað, umhirðu og fóðrun um 70 sauðfjár … með þeim afleiðingum að aflífa varð sex ær vegna ástands þeirra…"