Þorskurinn kominn í tísku hjá landanum

Neysla á þorski hefur stóraukist hjá landsmönnum frá bankahruni. Þetta sést á tölum sem Fiskistofa hefur tekið saman fyrir fisksala og stemmir við upplifun fisksala sem Fréttablaðið ræddi við. Eins gefa bráðabirgðatölur úr rannsókn, sem Matís er að gera um fiskneyslu Íslendinga, þetta sterklega til kynna.

Í ár hafa nú þegar verið seld 354 tonn af þorski til neyslu innanlands, samkvæmt tölum frá Fiskistofu, en það er mun meira en selt var til neyslu innanlands árið 2008.

Gunnþórunn Einarsdóttir, sérfræðingur hjá Matís, sem vinnur nú að rannsókn á fiskneyslu Íslendinga ásamt Emilíu Martinsdóttur kollega sínum, segir að þorskurinn rjúki upp vinsældalistann meðal ungs fólks.

Árið 2006 var þorskurinn fimmta vinsælasta sjávarfangið hjá íslenskum neytendum á aldrinum 18 til 27 ára. Í ár er svo komið að einungis ýsan er vinsælli en þorskurinn hjá þessum hópi. Gunnþórunn bendir þó á að þetta séu einungis bráðabirgðatölur.

Samkvæmt þeim var ýsan á boðstólum nánast einu sinni í viku árið 2006 og hefur lítil breyting orðið þar á. Árið 2006 var það hins vegar svo að þorskurinn var á boðstólum um það bil einu sinni í mánuði, hjá þessum hópi, en nú bragðar þessi hópur á þeim gula að minnsta kosti í annarri hverri viku. Hann hefur skotið bæði túnfiski, laxi og rækjum fyrir aftan sig á vinsældalistanum yfir sjávarfang hjá þessum aldurhópi.

Sveinn Kjartansson, einn eigenda Fylgifiska, segir að þar hafi sala á þorski aukist um tuttugu prósent síðustu ár. „Skýringin gæti falist meðal annars í því að fólk er farið að líta á þorskinn sem vænlegan veislumat sem þó er ekki svo dýr miðað við annan mat í þeim flokki,“ segir Sveinn.

Slæmu tíðindin eru þó þau að neysla á sjávarfangi hefur minnkað um fjórðung á nokkrum árum. Árið 2008, sem var reyndar algjört metár, sporðrenndu landsmenn um 7,5 þúsund tonnum af sjávarfangi en í fyrra einungis 5,5 þúsund tonnum. Mestur er samdrátturinn í ýsuneyslu, sem reyndist 5,7 þúsund tonn árið 2008, sem er meira en neyslan á öllu sjávarfangi í fyrra. Í fyrra var ýsuneyslan ekki nema rúmlega þrjú þúsund tonn.

jse@frettabladid.is