Garðar Gunnlaugs snýr aftur í fyrirsætubransann

„Þetta er eins og að koma heim,“ segir Garðar Gunnlaugsson, knattspyrnukappi, bjórframleiðandi og fyrirsæta.

Andlit Garðars hefur prýtt síður dagblaða á Íslandi undanfarna daga en hann situr fyrir í auglýsingu Hagkaupa á gúmmítúttum. Auglýsingin var ljósmynduð í byrjun sumars þegar Garðar var staddur hér á landi í fríi. „Eru það gúmmítúttur? Það er fyndið. Hagkaup biður mig alltaf um að hafa samband þegar ég er á landinu og mér finnst þetta skemmtileg vinna,“ segir Garðar, en hann var að jafna sig eftir aðgerð á mjóbaki á sjúkrahúsi í Þýskalandi þegar Fréttablaðið náði í hann.

Garðar byrjaði að sitja fyrir árið 2003 í kjölfar sigurs í Herra Ísland. Honum hefur reglulega brugðið fyrir í Hagkaupsbæklingnum, en hefur ekki sést á síðum bæklingsins síðustu misseri enda búsettur erlendis.

„Já, vá ég er búinn að vera í þessu með hléum í átta ár. Það er alltaf sama teymi á bak við þessar myndatökur svo það er yndisleg stemming í stúdíóinu,“ segir Garðar og útilokar ekki að rifja upp gamla takta og sitja fyrir á nærfötunum einum saman í framtíðinni. Síðast þegar hann gerði það var það með eiginkonu sinni, Ásdísi Rán Gunnarsdóttir. „Það var skemmtileg myndataka. Á meðan mér finnst þetta gaman tek ég eina og eina auglýsingu þegar ég er heima í fríi.“

Garðar greindist með brjósklos í baki fyrr í sumar og þurfti því að hætta við að ganga til liðs við íslenska fótboltaliðið ÍBV eins og til stóð. Hann segir það hafa verið mikil vonbrigði því hann var farinn að hlakka til að spila aftur á Íslandi. Nú er hann hins vegar á leið aftur til Búlgaríu þar sem fjölskyldan bíður eftir honum.

„Það er fullt að gera hjá Ásdísi. Ég má hins vegar ekkert æfa í sex vikur og fer svo í að koma mér í form,“ segir Garðar og bætir við að hann verði heimavinnandi húsfaðir og Ásdís sú sem vinnur fyrir heimilinu í Búlgaríu. „Hún hefur alltaf verið mjög dugleg kona og er búin að skapa sér stórt nafn í Búlgaríu.“

Garðar bætti nýverið í ferilskrá sína þegar hann hóf að framleiða bjór í Lettlandi. Bjórinn nefnist Krummi og bíður Garðar einungis eftir að fá leyfi fyrir innflutningi bjórsins, sem bíður tilbúinn á hafnarbakkanum í Lettlandi. „Þetta er besti bjór sem ég hef smakkað og maður hefur nú smakkað þá ófáa gegnum tíðina. Ég vona að öll leyfi verði komin í lok ágúst.“

alfrun@frettabladid.is