Óæskileg hegðun nemenda er helmingi minni en áður

Jákvæð samskipti kennara og nemenda í þremur skólum í Reykjanesbæ; Njarðvíkurskóla, Myllubakkaskóla og Holtaskóla, hafa aukist til muna. Óæskileg hegðun nemenda hefur snarminnkað. Þetta eru niðurstöður nýrrar umfangsmikillar rannsóknar á innleiðingu PBS (Positive Behavior Support) í skólana þrjá og árangur sem af því hlaust.

Rannsóknin er sú fyrsta sinnar tegundar sem gerð hefur verið á Íslandi og ein sú umfangsmesta í Evrópu. Kolbrún Ingibjörg Jónsdóttir gerði meistararitgerð sína um rannsóknina og segir hún fyrstu niðurstöður benda til þess að áhrifa PBS-kerfisins sé strax farið að gæta í jákvæðri athygli starfsfólks, umbun fyrir góða hegðun og virku eftirliti.

PBS er hannað til þess að styrkja æskilega hegðun starfsfólks og nemenda til þess að fyrirbyggja og draga úr erfiðri hegðun. Innleiðing kerfisins tekur um þrjú til fimm ár og það er yfirleitt ekki fyrr en í fyrsta lagi á öðru framkvæmdarári sem farið er yfir notkun starfsfólks á aðferðum til að breyta hegðun nemenda.

Í niðurstöðunum kom meðal annars fram að óæskileg hegðun nemenda á yngsta stigi í kennslustofum skólanna þriggja hefði minnkað um helming síðan PBS var innleitt. Jákvæð athygli starfsfólks hefur þá aukist til muna og hefur hlutfallið nær þrefaldast. Óviðeigandi hunsun starfsfólks hefur einnig minnkað um helming.

Gylfi Jón Gylfason, yfirsálfræðingur hjá Fræðsluskrifstofu Reykjanesbæjar, fékk hugmyndina að rannsókninni ásamt Zuilmu Gabríelu Sigurðardóttur. Tildrög rannsóknarinnar var mastersritgerð Ragnheiðar Sifjar Gunnarsdóttur, sem sá um verkefnið fyrstu árin og safnaði gögnum áður en innleiðing PBS hófst. Rannsóknin er unnin í samstarfi Reykjanesbæjar og Háskóla Íslands.

Gylfi Jón segir einar merkilegustu niðurstöðurnar vera þær að á sama tíma og hér gangi yfir efnahagshrun og atvinnuleysi, þar sem Reykjanesbær varð hvað verst úti, séu kennarahóparnir almennt jákvæðari í dag en fyrir hrun.

„Þetta er þvert á það sem maður hefði haldið að hrunið hefði haft áhrif á. Þá hefur dregið stórkostlega úr agavandamálum síðan við hófum innleiðingu kerfisins, “ segir Gylfi Jón. „Svona hugarfar ætti að vera öðrum til fyrirmyndar.“

sunna@frettabladid.is