Stúlkan sem lést í Árbæ neytti eiturefnis

Bráðabirgðaniðurstöður rannsóknar hafa leitt í ljós að kona um tvítugt sem fannst látin í íbúð í Árbæjarhverfi í Reykjavík hafði neytt fíkniefna sem innihéldu eiturefnið PMMA. Lögregla undirstrikar að endanleg niðurstaða varðandi dánarorsök konunnar liggur ekki fyrir. Vitneskja er að fíkniefna var neytt innandyra þar sem konan lést.

 

Nú þegar hafa fimm tilvik verið staðfest þar sem PMMA kemur við sögu hér á landi. Í þessum fimm tilvikum eiga fjórir einstaklingar hlut að máli. Einn þeirra er maður sem var tekinn fyrir umferðarlagabrot tvisvar sinnum með stuttu millibili og í bæði skiptin kom í ljós að hann var undir áhrifum fíkniefna, sem innihéldu PMMA.

 

Eins og fram hefur komið fannst blandað metamfetamín, sem inniheldur svokallað PMMA og er mjög eitrað, hér á landi í síðasta mánuði. Lögreglan á höfuðborgarsvæðinu hefur unnið að því að koma í veg fyrir frekari dreifingu á efninu og hefur meðal annars framkvæmt sjö húsleitir af þeim sökum. Við þær og fleiri aðgerðir tengdar rannsókninni hefur verið lagt hald á ýmis fíkniefni, þar á meðal PMMA. Ekki er samt hægt að fullyrða að lögreglan hafi komist yfir allt af hinu eitraða efni, sem hingað kom, og því er áfram eindregið varað við því að það kunni enn að vera á markaði hérlendis. Þá er það einnig verulegt áhyggjuefni að PMMA geti borist hingað aftur á nýjan leik, að því er fram kemur í tilkynningu sem lögreglan hefur sent frá sér.

- jss