Fréttaskýring: Eftirlitsstofnun bíður svars Íslands við áminningarbréfi

Ólafur Ragnar Grímsson, forseti Íslands, fullyrðir að ESA hafi ekkert sagt um Icesave sem mark sé á takandi. Frumniðurstöður ESA eru þegar komnar fram og eru þvert á fullyrðingar íslenskra stjórnvalda.

Hvað hefur ESA, eftirlitsstofnun EFTA, sagt um Icesave og málstað Íslendinga í málinu?

Ólafur Ragnar Grímsson, forseti Íslands, sagði ekkert mark takandi á því sem komið hafi frá ESA, eftirlitsstofnun EFTA, um Icesave-málið hingað til, á blaðamannafundi á sunnudag.

Þetta sagði Ólafur þrátt fyrir að ESA hafi sent íslenskum stjórnvöldum áminningarbréf þar sem fram kemur að stofnunin hafi komist að þeirri frumniðurstöðu að Íslandi beri að tryggja greiðslu á lágmarkstryggingu til breskra og hollenskra sparifjáreigenda.

„Ég veit ekki betur en að eftirlitsstofnun EFTA eigi eftir að gera málið upp við sig og að eftirlitsstofnun EFTA bíði núna eftir því að fá röksemdir og málflutning Íslendinga. Það væri nú skrýtið ef eftirlitstofnun EFTA færi að gefa einhvern úrskurð eða gefa eitthvað til kynna áður en málflutningur annars aðilans hefði komið fram," sagði Ólafur Ragnar á sunnudag.

„Eftirlitsstofnun EFTA hefur bara ekkert sagt um málið enn sem komið er sem mark er á takandi nema það heyrðust einhverjar einkaskoðanir manna hér í umræðunni sem þeir hlupu reyndar frá þegar þeim var bent á að það væri óeðlilegt," sagði Ólafur.

ESA sendi þann 26. maí í fyrra áminningarbréf til Íslands vegna Icesave-málsins. Þar kemur fram að ESA hafi komist að þeirri frumniðurstöðu að íslensk stjórnvöld séu skuldbundin til að tryggja greiðslur á lágmarkstryggingu á reikningum Landsbankans í Bretlandi og Hollandi.

Vísað er til þess í áminningarbréfinu að tilskipun um innstæðutryggingar sé hluti af EES-samningnum. Samkvæmt henni beri Íslandi að greiða hverjum innstæðueiganda ríflega 20 þúsund evrur í kjölfar falls Landsbankans.

Íslensk stjórnvöld hafa sett fram þau sjónarmið að nægilegt hafi verið að koma á fót Tryggingasjóði innstæðueigenda og fjármagnseigenda í samræmi við tilskipunina. Ráði sjóðurinn ekki við að greiða lágmarksinnstæðutryggingu sé það ekki á ábyrgð íslenskra stjórnvalda að greiða mismuninn.

Þá hefur ríkisstjórn Íslands haldið því fram að tilskipunin eigi ekki við í algeru efnahagshruni eins og orðið hafi hér á landi.

Í áminningarbréfi ESA kemur fram að stofnunin fallist á hvorugt af þessum sjónarmiðum íslenska ríkisins.

„Innstæðutryggingartilskipunin tryggir að sparifjáreigendur fái greiddar 20.000 evrur ef banki þeirra verður gjaldþrota. Öll ríki verða að sjá til þess að sparifjáreigendur njóti þeirrar verndar. Hún er nauðsynleg til þess að viðskiptavinir banka geti verið öruggir um sparifé sitt," er haft eftir Per Sanderud, forseta ESA, í tilkynningu sem send var fjölmiðlum eftir að áminningarbréfið var sent íslenskum stjórnvöldum.

brjann@frettabladid.is