Ömmur og afar, frænkur og frændur plötuð í pössun

„Þetta er ákaflega barnmargur hópur og því var þetta mikið púsluspil," segir Sigrún Sól, eiginkona Pálma Sigurhjartarsonar. Pálmi er Eurovision-sveitinni Vinir Sjonna sem flytur lagið Coming Home eftir Sigurjón heitinn Brink við texta Þórunnar Ernu Clausen.

Eiginkonur fimm Eurovision-faranna ætla að fara til Düsseldorf og styðja við bakið á sínum mönnum en Gunnar Ólason er sá eini sem er einn. „Hann á víst einhvern bangsa sem strákunum er tíðrætt um," grínast Sigrún Sól með.

Sigrún býst við miklu stuði í Þýskalandi en sjálf segist hún ekki vera mikill Eurovision-aðdáandi, það gæti hins vegar breyst með þessari ferð. „Fyrst og fremst verður auðvitað gaman að geta upplifað þetta með strákunum og stutt við bakið á þeim. Við komum út viku seinna, daginn fyrir fyrstu forkeppnina þannig að þetta verður mikið stuð. Maður hefur náttúrulega fylgst með þessu í fjarlægð. Pálmi hafði aldrei tekið þátt í Eurovision fyrr en nú þannig að þetta var hola í höggi hjá honum," segir Sigrún en Pálmi, Hreimur og Matthías hafa aldrei verið með í lokakeppninni ólíkt þeim Vigni Snæ, Gunnari Óla og Benedikt Brynleifssyni. „Þeir eru svona Eurovision-jómfrúr."

Sigrún verður reyndar ekki ein á ferð því með henni verður yngsti sonur hennar og Pálma en hann er sjö vikna gamall. „Ég var sett daginn sem úrslitakvöldið fór fram hjá RÚV en mætti samt." Eiginkonurnar hittust síðan allar í fyrsta skipti á kaffihúsi í Kringlunni á sjálfan Iceasave-daginn. Og það fór vel á með þeim.

„Við höfum hist svona innbyrðis en aldrei allar á einum og sama staðnum," segir Sigrún sem er fyrir löngu búin að gefast upp á því að fara á alla tónleika Pálma. „Það væri fullt starf ef maður gerði það og hann er líka alveg hættur að gera þá kröfu."

freyrgigja@frettabladid.is