ESA vísaði til sérlaga um Ríkisútvarpið

Í minnisblaði menntamálaráðuneytisins til menntamálanefndar Alþingis kemur fram að eftirlitsstofnun EFTA, ESA, vísi til sérlaga um Ríkisútvarpið ohf. í ákvörðun sinni um stöðu Ríkisútvarpsins (RÚV). Ákvörðun ESA varðar umbætur sem íslenska ríkið á að gera til að skilja á milli samkeppnisreksturs og almannaþjónustu í rekstri RÚV.

 

Í bréfi 365 miðla til menntamálanefndar um mánaðamótin, sem greint var frá í Fréttablaðinu í vikunni, er átalinn seinagangur í umbótum á lagaumhverfi fjölmiðla og talið að ESA vísi til þess að taka eigi á samkeppnisumhverfi í nýjum heildarlögum um fjölmiðla sem í vikunni voru tekin til annarrar umræðu á Alþingi. Skúli Helgason, formaður menntamálanefndar, segir hins vegar ekki óeðlilegt að 365 miðlar hafi misskilið efni ákvörðunar ESA. „Enda hefur félagið ekki í höndum þau bréf og önnur samskipti á milli ESA og íslenskra stjórnvalda sem liggja til grundvallar ákvörðuninni,“ segir hann.

 

Í athugasemd sem menntamálaráðuneytið sendi blaðinu vegna málsins er áréttað að tekið sé á samkeppnismálum í frumvarpi til fjölmiðlalaga í kafla um dreifingu hljóð- og myndefnis. Eðlilegt sé hins vegar að sérstakar takmarkanir eða heimildir til handa RÚV séu í sérlögum um það félag.

- óká