Kannanir benda til afar góðrar þátttöku

Búast má við mjög góðri þátttöku í þjóðaratkvæðagreiðslunni um gildi Icesave-laganna sem fram fer í dag. Góð svörun hefur verið í þeim skoðanakönnunum sem gerðar hafa verið síðustu daga og í könnun Fréttablaðsins, þar sem spurt var sérstaklega hvort fólk ætlaði á kjörstað, kom fram að um 90 prósent hygðust taka þátt í atkvæðagreiðslunni.

 

232.539 þúsund eru á kjörskrá, 116.656 konur og 115.883 karlar. Af einstökum kjördæmum eru flestir á kjörskrá í Suðvesturkjördæmi, um 60 þúsund, og rúmlega 44 þúsund í hvoru Reykjavíkurkjördæmanna um sig.

 

Í tíu sveitarfélögum eru kjósendur á kjörskrá innan við eitt hundrað.

Fjölgað hefur á kjörskrá um 2.600 frá Icesave-atkvæðagreiðslunni á síðasta ári. Á tólfta þúsund kjósenda er með lögheimili erlendis.

 

Kjörstaðir opna víðast hvar klukkan níu eða tíu. Í fjölmennustu sveitarfélögunum stendur kjörfundur til tíu í kvöld en skemur þar sem færri eru á kjörskrá.

 

Von er á fyrstu tölum fyrir klukkan ellefu í kvöld. Þær munu líkast til koma úr Norðausturkjördæmi en í Reykjavík er stefnt að því að fyrstu tölur verði opinberaðar á tólfta tímanum. Óvíst er hvenær endanlegar tölur liggja fyrir. Þar ráða veður og færð ekki minnstu því talið er á einum stað í hverju kjördæmi fyrir sig. Gangi allt að óskum má búast við að endanleg niðurstaða liggi fyrir í síðasta lagi á fimmta tímanum.

 

Atkvæðagreiðslan í dag er sú áttunda í röð þjóðaratkvæðagreiðslna. Sú fyrsta var 1908 og snerist um setningu laga um innflutningsbann á áfengi. Greidd voru atkvæði um þegnskylduvinnu 1916, um dans-íslensk sambandslög 1918, afnám innflutningsbanns á áfengi 1933, niðurfellingu dansk-íslenska sambandslagasamningsins og um stjórnarskrá lýðveldisins 1944 og Icesave-lög 2010.

 

Fjölmargir hafa greitt atkvæði utan kjörfundar, fleiri heldur en fyrir ári. Fólki sem það hefur gert er heimilt að greiða atkvæði í dag. Utankjörfundaratkvæðaseðill þess kemur þá einfaldlega ekki til greina.

 

bjorn@frettabladid.is