Menntskælingar keppa um hálfa milljón í söngkeppni

„Það er engin kreppa í söngkeppninni. Kreppan er bara búin," segir Tindur Jensson, verkefnisstjóri hjá viðburðafyrirtækinu AM Events.

 

Fyrirtækið heldur utan um Söngkeppni framhaldsskólanna sem fer fram á laugardaginn. Sigurvegarinn fer ekki heim með tvær hendur tómar þegar úrslitin verða kunngjörð í beinni útsendingu á Stöð 2 því hann fær verðlaun sem nema um hálfri milljón íslenskra króna. Meðal þess er ferð fyrir einn til Ibiza með öllu tilheyrandi, iPhone 4 sími, árskort í Hreyfingu og 60 þúsund króna úttekt frá Cintamani auk tveggja daga í Stúdíó Sýrlandi.

„Tímarnir breytast, þetta eru allsvakaleg verðlaun. Ætli skólinn min, Margmiðlunarskólinn, geti tekið þátt?" spyr Sverrir Bergmann, sem vann þessa keppni árið 2000 þegar hann söng Bon Jovi slagarann Always við íslenskan texta Auðuns Blöndal. Verðlaunin þá voru ekkert í líkingu við það sem tíðkast nú.

 

„Ég man mjög vel að ég fékk farandbikar en ekki eignarbikar, sem var mjög súrt, og svo einhverja tíma í hljóðveri," rifjar Sverrir upp. Hann fékk reyndar líka síma eins og sigurvegarinn í ár; bláan Sony Ericsson og honum fylgdi símanúmer. „Hann þótti mjög flottur á sínum tíma og hefur örugglega kostað fimmtán þúsund krónur." Sverrir fékk einnig út að borða fyrir tvo en man ómögulega á hvaða veitingastað það var. „Ég man bara að ég fékk mér pitsu."

 

Alls keppir 31 atriði um þennan eftirsóknarverða titil en við sögu kemur 71 keppandi frá öllu landinu. Keppnin fer að venju fram í Íþróttahöllinni á Akureyri, sem tekur tvö þúsund gesti í sæti, og munu Mið-Íslands félagarnir Jóhann Alfreð og Bergur Ebbi kynna keppnina í ár. Öll gistihús og hótel eru uppbókuð fyrir norðan enda fer snjóbretta- og tónlistarhátíðin AK Extreme fram á sama tíma. Er því búist við metfjölda menntskælinga til bæjarins um helgina.

freyrgigja@frettabladid.is