Jóhanna sló á sáttahönd atvinnulífsins

Jóhanna Sigurðardóttir forsætisráðherra sló sáttatillögu Samtaka atvinnulífsins um lausn í sjávarútvegsmálum út af borðinu með afgerandi hætti á aðalfundi samtakanna í gær. Vilmundur Jósefsson, formaður SA, lýsti furðu sinni á afstöðu ráðherra en samtökin hafa sett niðurstöðu í sjávarútvegsmálum sem skilyrði fyrir gerð kjarasamninga.

 

Jóhanna sagði í ávarpi sínu að krafa SA um að stjórnvöld leystu áratuga langan ágreining um sjávarútvegsmál óbilgjarnar og sagði grundvallaratriði að „festa ekki í sessi forgang núverandi kvótahafa í lokuðu kerfi næstu áratugina og koma í veg fyrir að þeir geti fénýtt sér þessa sameign landsmanna sem fiskimiðin eru“. Hún sagði að útspil SA í málinu, sáttatillöguna, staðfesta að „himinn og haf“ séu á milli stjórnvalda og LÍÚ. „Því verður vart trúað að samstaða sé um það milli allra aðildarfélaga SA að setja það sem skilyrði og hótun fyrir því að kjarasamningar náist að þetta áratuga deilumál verði leyst meira og minna á forsendum LÍÚ, annars gangi menn frá borði,“ bætti Jóhanna við.

 

Vilmundur Jósefsson, formaður SA, brást illa við ræðu Jóhönnu í viðtali við Fréttablaðið og sagði samtökin ekki hvika frá þeirri kröfu að sjávarútvegsmálin yrðu leyst áður en skrifað væri undir kjarasamningana.

 

Vilmundur viðurkenndi að ræða Jóhönnu væri köld kveðja inn í yfirstandandi kjaraviðræður og henni fylgdi mikil óvissa og sagðist efast um að Jón Bjarnason, landbúnaðar- og sjávarútvegsráðherra, valdi málinu. „Ég segi það í því ljósi að hann hefur verið með málið í fanginu frá því í september 2010 og ekkert hefur gerst. Við höfum ekki fengið að sjá frumvarpið eða beina aðkomu að málinu, sem er einfaldlega fáránlegt,“ segir Vilmundur.

 

svavar@frettabladid.is