Ámælisvert að hunsa álit ESA

Viðbrögð stjórnvalda við áliti ESA, eftirlitsstofnun EFTA, um stöðu Ríkisútvarpsins (RÚV) á fjölmiðlamarkaði eru með eindæmum daufleg, að mati Ara Edwald, forstjóra 365 miðla. „ESA krefst þess að stjórnvöld setji inn í fjölmiðlalögin, ekki bara lög um RÚV, grundvallarreglur sem gæta þarf að varðandi samkeppnisstöðu á fjölmiðlamarkaði,“ segir hann.

Fjölmiðlafrumvarpið verður tekið til annarrar umræðu á Alþingi í dag. Að lokinni fyrstu umræðu gekk frumvarpið til menntamálanefndar en var afgreitt þaðan fyrir rúmri viku, eftir að hafa tekið nokkrum breytingum.

Í athugasemdum sem 365 miðlar sendu menntamálanefnd eftir síðustu afgreiðslu hennar á frumvarpinu er átalið að það taki í engu á hlutverki RÚV á auglýsingamarkaði þrátt fyrir að komið hafi fram í umsögnum að óeðlilegt væri „að setja heildstæða löggjöf um fjölmiðla án þess að hún taki á neinn hátt á alvarlegri stöðu samkeppnismála í greininni og úrræðaleysi við brotum“.

Með ólíkindum er sagt að nefndarálit meirihlutans víki ekki að ákvörðun ESA frá 9. febrúar síðastliðnum. „Í ákvörðuninni kemur skýrt fram að það verði í fjölmiðlalögunum sjálfum að gefa samkeppni á markaðinum fótfestu, ef koma á í veg fyrir óheilbrigða samkeppni,“ segir í athugasemd 365.

Eftir að menntamálanefnd skilaði frumvarpinu til annarrar umræðu sagði Skúli Helgason, formaður nefndarinnar, Fréttablaðinu að tekið yrði á álitamálum tengdum RÚV í frumvarpi til nýrra laga um stofnunina sem leggja ætti fram í næsta mánuði. Sama sagði Katrín Jakobsdóttir, mennta- og menningarmálaráðherra.

Í umsögn 365 er hins vegar sagt engan veginn nægja að huga að stöðu RÚV á auglýsingamarkaði í sérlögum um RÚV. „Það fer þvert gegn ákvörðun ESA um nauðsyn þess að huga að samkeppnismálum í heildarlöggjöf um fjölmiðlamarkaðinn. Í áliti ESA kemur einnig fram að það sé brýnt að í fjölmiðlalögum verði fundinn farvegur úrlausna í samkeppnismálum til að auka skilvirkni og gagnsæi eftirlits. Til að mæta þeim kröfum ESA væri til að mynda aðgengilegt að veita Samkeppniseftirlitinu heimild í stjórnsýslukafla frumvarpsins til að hafa afskipti af þessari atvinnugrein,“ segir í bréfi 365 miðla til menntamálanefndar og talið ámælisvert að nefndin kjósi að virða að vettugi skýrt álit ESA. „Með því er vísvitandi verið að brjóta gegn regluverki EES og engin tilraun gerð til að tryggja sanngjarna samkeppni samkvæmt skuldbindingum EES-réttar.“

365 miðlar eiga meðal annars og reka Stöð 2, Bylgjuna og Fréttablaðið. Álit ESA varðandi stöðu RÚV, má rekja til kæru sem Norðurljós, forveri 365, lagði inn fyrir níu árum.

olikr@frettabladid.is