Sat inni fyrir árás á móðurina og afann

Karlmaður um fimmtugt sem situr í gæsluvarðhaldi, grunaður um að hafa beitt son sinn á áttunda ári grófri kynferðislegri misnotkun, á að baki langan sakaferil og hefur meðal annars verið dæmdur fyrir ofbeldisbrot. Frændi föðurins sætir einnig gæsluvarðhaldi, grunaður um sömu brot.

Mennirnir voru handteknir fyrir síðustu helgi og úrskurðaðir í gæsluvarðhald, sem rennur út í dag, eins og Fréttablaðið greindi frá í gær. Þeir verða yfirheyrðir í dag og í framhaldinu tekin ákvörðun um hvort lögð verður fram krafa um framlengingu gæsluvarðhalds yfir þeim.

Við handtökur mannanna var húsleit gerð á heimilum þeirra og hald lagt á tölvubúnað. Marijúana og hvítt efni, sem grunur leikur á að sé kókaín, fannst við leitina. Lögregla vann að því í gær að leita í tölvum mannanna, en grunur leikur á að þar sé að finna myndir af börnum, þar á meðal syni mannsins, sem sýna þau á kynferðislegan og klámfenginn hátt. Þeirri leit var ekki lokið þegar fréttin var skrifuð.

Foreldrar drengsins eru skilin og dvaldi drengurinn stundum hjá föður sínum um helgar. Talið er að þá hafi kynferðisbrotin gegn barninu átt sér stað. Talið er að þau hafi verið mjög gróf og átt sér stað í nokkurn tíma. Málið barst ofbeldisbrotadeild lögreglunnar á höfuðborgarsvæðinu frá barnaverndarnefnd Kópavogs.

Í fréttum Bylgjunnar í gær kom fram að móðir drengsins og stjúpi hans hafi þurft að flýja heimili sitt með drenginn og börn sem þau eiga saman vegna hótana frá mönnunum tveimur, sem nú sitja bak við lás og slá. Þau vildu ekki tjá sig um málið við Fréttablaðið.

Faðirinn, sem grunaður er um að hafa brotið gegn drengnum, hefur hlotið tíu refsidóma, þar á meðal fyrir líkamsárásir, fjársvik, fíkniefnalagabrot og fleira. Síðast var hann dæmdur í fangelsi á árinu 2007 fyrir að ráðast á móður drengsins og föður hennar. Þá sparkaði hann í og skemmdi bíl afa drengsins.

jss@frettabladid.is