Vilja kvóta til minnst 35 ára með rétti til að framlengja

Samtök atvinnulífsins hafa kynnt ríkisstjórninni útspil sem þau kalla „tillögu til sátta um efnislega útfærslu samningaleiðar í sjávarútvegi." „Tillagan felur í sér grundvallarbreytingar á stjórn fiskveiða frá því sem nú er og komið er verulega til móts við sjónarmið stjórnarflokkanna í þessum efnum," segir í yfirlýsingu frá SA.

Lagt er til að gerðir verði samningar á milli ríkisins og útgerða um tímabundin afnot útgerða af kvótanum. „Afnotatími útgerða af aflahlutdeild verði til að minnsta kosti 35 ára. Samningarnir feli í sér að þegar hluti samningstímans er liðinn, til að mynda þegar hann verður hálfnaður, þá hafi útgerðir rétt til framlengingar þannig að jafn langur tími og liðinn er bætist við þann tíma sem eftir er," segir SA um tillögurnar. Innan svokallaðar sáttanefndar sem skilaði af sér niðurstöðum í fyrrahaust var rætt um allt frá tíu árum upp í 65 ár í þessu sambandi.

Þá er lagt til að veiðigjald miðist við hagnað útgerðarfyrirtækja í stað reiknaðrar framlegðar eins og nú. Framlegð er upphæð sem svarar til tekna fyrirtækja að frátöldum breytilegum kostnaði en ekki föstum kostnaði á borð við vaxtakostnað. SA segir veiðigjaldið vera hátt í þrjá milljarða króna á fiskveiðiárinu 2010 til 2011.

Vilmundur Jósefsson, formaður SA, segir samtökin leggja til að aðeins um þrjú prósent af heildarkvótanum verði tekin út fyrir kerfið til sérstakrar úthlutunar ráðherra en ekki fimmtán prósent eins og þeir telji stefna í af hálfu ríkisstjórnarnnar.

„Það er alveg klárt að það verður ekki skrifað undir neina kjarasamninga á meðan verið er að rústa sjávarútveginum eins og er samkvæmt frumvarpi sem búið er að smíða eftir því sem við komust næst. Ég held að forystumenn ríkisstjórnarinnar séu ekki farnir að skilja það ennþá að við ætlum ekki að gefa þetta eftir," segir Vilmundur.

Hvorki náðist tal af Jóhönnu Sigurðardóttur forsætisráðherra, Steingrími J. Sigfússyni fjármálaráðherra né Jóni Bjarnasyni sjávarútvegsráðherra vegna þessa máls í gær. Ekki náðist heldur í Lilju Rafneyju Magnúsdóttur, formann sjávarútvegs- og landbúnaðarnefndar Alþingis. Ólína Þorvarðardóttir, varaformaður nefndarinnar, var erlendis og kvaðst ekki hafa kynnt sér tillögu SA. Þeir fulltrúar stjórnarflokkanna sem rætt var við í gær sögðu hins vegar að tillögur SA breyttu engu um afstöðu ríkisstjórnar. Það eigi bæði við um sjávarútvegsmálin sjálf og tengingu þeirra við kjaraviðræður SA og ASÍ.

Vilmundur segir SA hafa átt tvo fundi með sjávarútvegsráðherra um tillögurnar. „Það er bara talað út og suður," segir formaður SA um þá fundi.

gar@frettabladid.is