Darraðardans Charlie Sheen eykur vinsældir fréttaþátta

Fall leikarans Charlie Sheen hefur verið á allra vörum í Hollywood undanfarnar vikur. Hann hefur verið rekinn úr hlutverki sínu í gamanþáttunum Two and a Half Men, en á meðan aukast vinsældir þeirra sem fjalla um leikarann.

Vinsældir fréttaþátta sem fjalla meðal annars um hegðun Charlie Sheen hafa aukist eftir að leikarinn fór út af sporinu fyrir skömmu. Þátturinn Entertainment Tonight hefur sjaldan verið vinsælli og áhorf á svipaða þætti á borð við Inside Edition, Access Hollywood og The Insider hefur aukist frá fimm og upp í 17 prósent.

Vinsældaraukningin er rakin beint til Charlie Sheen, en slúðurþyrstir fylgjast nú agndofa með hegðun leikarans, sem hefur verið allt annað en eðlileg undanfarið. eftir að viðtöl birtust við hann í síðustu viku, þar sem hann sagðist vera með tígrisdýrablóð í æðum og að hann væri á uppleið.

Skömmu síðar skráði hann sig á samskiptasíðuna Twitter og byrjaði að ausa úr viskubrunni sínum. Vinsældirnar létu ekki á sér standa og fleiri en milljón notendur skráðu sig sem fylgjendur á einum sólarhring. Skömmu síðar var hópurinn kominn upp í tvær milljónir og í dag stendur hann í tæplega 2,4 milljónum.

Hegðun Sheens hefur farið fyrir brjóstið á ýmsum. Þegar hann bætti sér á Twitter-lista leikkonunnar ungu Sarah Hyland úr Modern Family tilkynnti hún að hún vildi alls ekki hafa hann á listanum.

Charlie Sheen hefur verið rekinn úr hlutverki sínu sem Charlie Harper í þáttunum Two and a Half Men og er því atvinnulaus í dag. Leikararnir John Samos og Rob Lowe hafa verið nefndir til sögunnar sem eftirmenn hans.