Grími meinað að flytja inn hljómsveitir á eigin vegum

„Ég ætla ekki að vera virkur í tónleikahaldi, enda hef ég ekki áhuga á því. Það er erfitt að vera tónleikahaldari á Íslandi," segir Grímur Atlason, framkvæmdastjóri Iceland Airwaves hátíðarinnar.

Grímur hefur verið ráðinn í fullt starf við hátíðina. Hann var ráðinn í hálft starf í fyrra og stýrði hátíðinni í fyrsta skipti í október sama ár. Í samningi sem gerður var við Grím er ákvæði sem meinar honum að standa í innflutningi á erlendum hljómsveitum, en hann hefur staðið í slíkum rekstri síðustu ár og kemur að tónleikum bresku hljómsveitarinnar Hurts í þessum mánuði.

Tónleikahaldarinn Kári Sturluson gagnrýndi aðkomu Gríms að tónleikum Hurts í Fréttablaðinu á dögunum. Sagði hann Grím nýta tengsl í krafti opinberrar stöðu sem framkvæmdastjóri Iceland Airwaves í eigin rekstri. Anna Hildur Hildibrandsdóttir, framkvæmdastjóri Útflutningsskrifstofa íslenskrar tónlistar (ÚTÓN), sem heldur utan um Iceland Airwaves, og stjórn ÚTÓN töldu ekki að um hagsmunaárekstra væri að ræða.

Anna Hildur segir að ÚTÓN hafi ekki getað skipt sér af því hvernig Grímur aflaði sér tekna þegar hann var aðeins í hálfu starfi við hátíðina. „Það var skilningur á því frá upphafi að ef starfshlutfallið myndi breytast myndi hann ekki sinna innflutningi á hljómsveitum," segir hún.

Grímur Atlason segist ekki hafa áhuga á því að halda stóra tónleika á eigin vegum. Hann segir ákvæðið um tónleikahald hans eðlilegt í fámenninu á Íslandi. „Hins vegar er alveg sama hvað ég geri á Íslandi, eða einhver. Maður er alltaf tengdur öllu, alltaf með frændur sína og frænkur, afa sinn og ömmu að gera eitthvað rosa fínt," segir hann.

Þrátt fyrir að hafa verið í hálfu starf við hátíðina í fyrra segir Grímur að hann og annað starfsfólk hátíðarinnar hafi unnið í 100 til 200 prósent starfi, en fengið borgað fyrir hálft starf eða minna. „Það var ekki rakið að þetta myndi ganga upp. Til að keyra hátíðina upp þurfti að gera mjög margt, en það var ekki til mikill peningur," segir hann.

Þannig að munurinn er sá að nú færðu borgað fyrir vinnuna?

„Já, en ég ætla ekki að fara að grenja. Ég réði mig upp á þessi býtti."atlifannar@frettabladid.is