Unnu við verstu mynd ársins

„Ég get ekki annað sagt en að hún sé vel að þessu komin," segir brellumeistarinn Haukur Karlsson. Ævintýramyndin The Last Airbender sem hann starfaði við ásamt Jóhannesi Sverrissyni hlaut Razzie-skammarverðlaunin í Hollywood sem versta mynd síðasta árs.

Leikstjóri hennar er M. Night Shyamalan, höfundur The Sixth Sense, og fóru brellutökur Hauks og Jóhannesar fram í fimbulkulda á Grænlandi, eins og komið hefur fram í Fréttablaðinu.

„Þegar ég fór að sjá hana í bíó var það eiginlega hálf pínlegt. Það sem ég gerði, Grænlandsparturinn, gerðist á fyrstu tíu mínútunum. Það var mikið spáð í því að halda ekkert áfram eftir hlé en maður lét sig nú hafa það," segir Haukur og getur ekki annað en hlegið að Razzie-verðlaununum. „Það fyndnasta af öllu er að hún kom ekki út í tapi. Myndin kostaði 150 milljónir dollara en þénaði tvö eða þrjú hundruð."

Haukur vann á sínum tíma við myndina The Flags of Our Fathers, sem var tilnefnd til tvennra Óskarsverðlauna, sem er himinn og haf frá Razzie-verðlaununum. „Verður maður ekki að prófa að vera báðum megin á skalanum," segir hann léttur.

Haukur rekur núna brellufyrirtæki með Jóhannesi og tveimur Dönum sem hann kynntist við gerð The Last Airbender. Þeir unnu saman að dönsku myndinni ID:A sem verður frumsýnd í haust og er dýrasta hasarmyndin sem var gerð í Skandinavíu í fyrra. - fb