Þyrla gat ekki sótt sjómann - ástand skipverja stöðugt

Þyrla Landhelgisgæslunnar var kölluð út rétt fyrir klukkan tíu í gærkvöldi til að sækja slasaðan sjómann um borð í togara sem staðsettur var um 100 sjómílur vestur af Garðsskaga.

Samkvæmt tilkynningu á heimasíðu gæslunnar fór þyrlan í loftið klukkan 22:42 og var skipstjóri beðinn um að sigla á móti þyrlunni en slæmt veður var á svæðinu eða 20-25 m/sek og ölduhæð 6-10 metrar.

TF-LÍF var komin á staðinn klukkan 23:40 og voru gerðar nokkrar tilraunir til að koma sigmanni þyrlunnar um borð í togarann. Þyrlan varð frá að hverfa vegna ölduhæðar og veðurs. Að sögn skipstjóra er ástand skipverja stöðugt, vel er fylgst með líðan hans og verður staðan endurmetin ef þurfa þykir.

Togarinn er væntanlegur til lands síðar í dag.