Össur tekur undir gagnrýni á dóminn yfir Tímósjenkó

Össur Skarphéðinsson utanríkisráðherra lýsir yfir miklum vonbrigðum með dóminn yfir Júlíu Tímósjenkó, fyrrum forsætisráðherra Úkraínu, sem var dæmd til sjö ára fangavistar í gær fyrir misbeitingu valds. Í tilkynningu frá utanríkisráðuneytinu segir að ráðherra taki undir yfirlýsingu Evrópusambandsins þar sem framkvæmd réttarhaldanna yfir Tímósjenkó er gagnrýnd harðlega og mun Össur styðja samhljóða ályktun sem lögð verður fyrir hjá Öryggis- og samvinnustofnun Evrópu,ÖSE, í vikunni.

Þá segir að réttarhöldin hafi ekki staðist alþjóðlegar kröfur um málsmeðferð, þrátt fyrir ítrekaðar áskoranir um úrbætur. Mikilvægt sé að lögð verði áhersla á eðlilega málsmeðferð við hugsanlega áfrýjun dómsins. Dómurinn og málsmeðferðin valda sérstökum vonbrigðum þar sem Úkraína gegnir nú formennsku í ráðherranefnd Evrópuráðsins og mun taka við formennsku ÖSE 2013.