Pétursbúð opin í dag

Kaupmaðurinn á horninu er með búðina opna í dag, en Pétursbúð skýtur stóru verslunarkeðjunum þannig ref fyrir rass, sem flestar hafa lokað yfir jólin. Hægt verður að komast í apótek á tveimur stöðum á landinu, en ÁTVR verður lokuð fram á þriðjudag.

Lokað er í verslunum Nettó, Bónus og Krónunnar á jóladag og annan í jólum, en opið á hefðbundnum afgreiðslutíma frá 27. desember.

Lokað er í öllum verslunum Hagkaupa í dag, en sólahringsverslanir í Skeifunni, Garðabæ og Eiðistorgi opna klukkan ellefu í fyrramálið. Aðrar verslanir eru með hefðbundinn afgeiðslutíma frá 27. desember.

Lokað er í verslunum 10-11 þar til á miðnætti í nótt, þegar sólarhringsopnun tekur við.

Hins vegar er opið í Pétursbúð við Ránargötu frá hádegi og til klukkan fimm síðdegis í dag. Sami háttur var hafður á í fyrra, en að sögn kaupmannsins hefur hann orðið var við að fólk sé þakklátt fyrir að komast í matvöruverslun á jóladag.

Öll apótek nema í Lágmúla og á Smáratorgi eru lokuð, en þar er Lyfja með opið fram á nótt. Annan í jólum er Lyfja að auki með opið í Keflavík, en apótek Lyfja og Heilsu verða þá opin í Austurveri til klukkan ellefu að kvöldi, og í Keflavík til klukkan tvö síðdegis.

Lokað er í verslunum ÁTVR á jóladag og annan í jólum, en hefðbundinn opnunartími tekur við þann 27. desember.